பல்டி பட ஹீரோவின் படத்திற்கு சென்சாரில் சிக்கல் : நீதிமன்றத்தை நாடிய படக்குழு
ADDED : 9 hours ago
மலையாள திரையுலகில் வளர்ந்து வரும் இளம் முன்னணி நடிகர் ஷேன் நிகம். கடந்த வருடங்களில் வெளியான ஆர்டிஎக்ஸ், வெயில் என தொடர்ந்து வெற்றி படங்களில் நடித்து வரும் அவர் சமீபத்தில் தமிழ், மலையாளம் என இரு மொழிகளில் வெளியாகி வரவேற்பை பெற்ற பல்டி படத்திலும் கதாநாயகனாக நடித்திருந்தார். அவரது அடுத்த படமாக ஹால் என்கிற படம் மலையாளத்தில் உருவாகியுள்ளது. சமீபத்தில் இந்தப் படம் சென்சார் சான்றிதழுக்காக அனுப்பப்பட்டது. படத்தைப் பார்த்த அதிகாரிகள் 19 இடங்களில் காட்சிகளை வெட்ட வேண்டும் என்று வலியுறுத்தியுள்ளனர்.
அது மட்டுமல்ல ஒரு பாடல் காட்சியில் ஒரு சிலர் மாட்டு இறைச்சி பிரியாணி சாப்பிடுவது குறிப்பிட்ட ஒரு பிரிவினரை சுட்டிக்காட்டுவது போல இருக்கிறது என்றும் கூறி அவற்றையும் நீக்க வலியுறுத்தி உள்ளனர். இதனை தொடர்ந்து தங்கள் கருத்து சுதந்திரம் பாதிக்கப்படுவதாக கூறி கேரள உயர் நீதிமன்றத்தை அணுகி மனு தாக்கல் செய்துள்ளனர் ஹால் படக்குழுவினர். சமீபகாலமாக மலையாள படங்கள் தொடர்ந்து இப்படி சென்சாரின் கிடுக்கிப்பிடிக்கு ஆளாவது தொடர்கதையாக மாறி உள்ளது..