'மூக்குத்தி அம்மன் 2' படப்பிடிப்பை நிறைவு செய்த கன்னட நடிகர் துனியா விஜய்

கடந்த 202௦ல் நயன்தாரா நடிப்பில் நடிகர் ஆர்ஜே பாலாஜி இயக்கத்தில் வெளியான 'மூக்குத்தி அம்மன்' படம் மிகப்பெரிய வெற்றியை பெற்றது. இதனை தொடர்ந்து தற்போது இந்த படத்தின் இரண்டாம் பாகம் 'மூக்குத்தி அம்மன் 2' என்கிற பெயரில் தயாராகி வருகிறது. ஆனால் இந்த இரண்டாம் பாகத்தை இயக்குனர் சுந்தர் சி இயக்கி வருகிறார். இந்த படத்தில் நயன்தாராவுடன் நடிகை மீனா, ரெஜினா கசான்ட்ரா ஆகியோர் நடித்து வருகின்றனர். இந்த படத்தில் நடிப்பதன் மூலம் நடிகர் துனியா விஜய் தமிழ் திரையுலகில் அடி எடுத்து வைத்துள்ளார்.

கன்னடத்தில் நடிகர், இயக்குனர் என கடந்த 20 வருடங்களாக இரட்டை சவாரி செய்து வரும் துனியா விஜய் இந்த படத்தில் வில்லனாக நடித்துள்ளார். இந்தநிலையில் தற்போது இந்த படத்தில் துனியா விஜய் சம்பந்தமான காட்சிகள் நிறைவு பெற்றுள்ளன. இதனைத் தொடர்ந்து சுந்தர்.சி உள்ளிட்ட படக்குழுவினரிடம் அவர் விடைபெற்று கிளம்பினார். இது குறித்த வீடியோ ஒன்று படப்பிடிப்பு தளத்திலிருந்து வெளியாகி உள்ளது.