அறிமுகப்படுத்திய இயக்குனருக்கு நன்றி சொன்ன மோகன்லால் மகள்

மலையாளத்தில் கடந்த சில வருடங்களுக்கு முன்பு '2018' என்கிற படம் வெளியாகி மிகப்பெரிய வெற்றியை பெற்றதுடன், 200 கோடிக்கு மேல் வசூலித்தது. அந்தப்படத்தின் இயக்குனர் ஜூட் ஆண்டனி ஜோசப் அடுத்ததாக மோகன்லால் நடிப்பில் படம் இயக்குவார் என எதிர்பார்க்கப்பட்ட நிலையில் அவருக்கு பதிலாக மோகன்லாலின் மகள் விஸ்மாயாவை கதாநாயகியாக அறிமுகப்படுத்தி 'தொடக்கம்' என்கிற படத்தை இயக்கி வருகிறார்.

இந்த படத்தின் படப்பிடிப்பு சமீபத்தில் நிறைவடைந்து தற்போது போஸ்ட் புரொடக்ஷன் பணிகள் நடைபெற்று வருகின்றன. இந்த நிலையில் இயக்குனர் ஜூட் ஆண்டனி ஜோசப்புக்கு நன்றி சொல்லி தனது சோசியல் மீடியா பக்கத்தில் பதிவு ஒன்றை வெளியிட்டுள்ளார் விஸ்மாயா மோகன்லால்.

இது குறித்து அவர் வெளியிட்டுள்ள பதிவில், “அன்புள்ள ஜூட் சேட்டா.. இப்படிப்பட்ட ஒரு அருமையான கதாபாத்திரத்தில் நடிக்கும் ஒரு மிகச்சிறந்த வாய்ப்பை எனக்கு கொடுத்ததற்காகவும் இந்த கதாபாத்திரத்திற்கு உயிர் கொடுப்பேன் என என் மீது நீங்கள் நம்பிக்கை வைத்ததற்கும் என்னுடைய மனப்பூர்வமான நன்றியை உங்களுக்கு தெரியப்படுத்த விரும்புகிறேன். இந்த அனுபவம் வாழ்க்கை பயணத்தில் ஒரு முறை மட்டுமே கிடைப்பது போன்று இருந்தது. எனக்கு அழகான ஆடைகளை வடிவமைத்துக் கொடுத்ததற்காக உங்கள் மனைவி டயானாவுக்கும் சிறப்பு நன்றியை தெரிவித்துக் கொள்கிறேன்” என்று கூறியுள்ளார்.