அல்லு சினிமாஸ் 'புகழ் சுவர்' - அட்லிக்கு இடம் தந்த அல்லு அர்ஜுன்

தெலுங்குத் திரையுலகத்தின் முக்கிய குடும்பமான அல்லு அர்ஜுன் குடும்பத்தினர் ஹைதராபாத்தில் 'அல்லு சினிமாஸ்' என்ற மல்டிபிளக்ஸ் தியேட்டர் ஒன்றை நேற்று திறந்தனர். அந்த தியேட்டருக்குள் 'வால் ஆப் பேம்' எனப்படும் 'புகழ் சுவர்' ஒன்று இடம் பெற்றுள்ளது. அதில் இந்தியத் திரையுலகத்தின் முக்கிய இயக்குனர்களின் புகைப்படங்கள் இடம் பெற்றுள்ளது.

அந்த சுவற்றில் தமிழ் இயக்குனரான அட்லி புகைப்படமும் இடம் பெற்றுள்ளது. தமிழ், ஹிந்தி என இதுவரையில் 5 கமர்ஷியல் படங்களை இயக்கியவர் அட்லி. தற்போது அல்லு அர்ஜுனின் 22வது படத்தை இயக்கி வருகிறார். ஐந்து படங்களை மட்டுமே இயக்கிய ஒரு கமர்ஷியல் இயக்குனரான அட்லிக்கு தங்களது சினிமா தியேட்டர் வளாகத்தில் இப்படி ஒரு முக்கியத்துவத்தை அல்லு அர்ஜுன் கொடுத்திருப்பது ஆச்சரியத்தை ஏற்படுத்தியுள்ளது.

அட்லியின் குருநாதரான ஷங்கர் படமும், தெலுங்கு, ஹிந்தியில் சில பல சூப்பர் ஹிட் படங்களைக் கொடுத்த ராம் கோபால் வர்மா படமும் அதில் இடம் பெறவில்லை. தமிழ் இயக்குனர்களான மணிரத்னம், வெற்றிமாறன் ஆகியோரது படங்கள் அதில் இடம் பெற்றுள்ளது. 'எ லாஞ்ச்' என்ற இடத்தில் மறைந்த இயக்குனர்கள் கே விஸ்வனாத், கே பாலசந்தர், தாசரி நாராயண ராவ் ஆகியோரது படங்கள் மற்றும் சீனியர் இயக்குனர் கே ராகவேந்திர ராவ் படங்கள் வைக்கப்பட்டுள்ளன.

மேலும், சில சீனியர் தெலுங்கு இயக்குனர்களின் படங்கள் அதில் ஏன் இடம் பெறவில்லை என தெலுங்கு ரசிகர்கள் கேள்வி எழுப்பியுள்ளார்கள். இந்த சர்ச்சையை அடுத்து அந்தப் புகைப்படங்களில் கூடுதலாக சிலரது படங்களைச் சேர்ப்பார்களா அல்லது எந்த மாற்றமும் இருக்காதா என்பது இனிமேல் தான் தெரிய வரும்.