ஏஜிஎஸ் படத்தில் சாய் அபயங்கர் : இசையா.... ஹீரோவா...

தென்னிந்திய சினிமாவில் ஜென் சி கிட்ஸின் இசை பிரியராக மாறியிருக்கிறார் சாய் அபயங்கர். ஆல்பம் பாடல்களில் பிரபலமாகி இப்போது படங்களுக்கும் இசையமைக்கிறார். அதிலும் ஆரம்பத்திலேயே சூர்யா, அல்லு அர்ஜூன், தனுஷ், சிம்பு, கார்த்தி என முன்னணி நடிகர்களின் படங்களுக்கு இசையமைத்து வருகிறார்.

இந்நிலையில் ஏஜிஎஸ் நிறுவனத்துடன் சாய் அபயங்கர் கைகோர்த்துள்ளார் என அந்த நிறுவனம் அறிவித்துள்ளது. ஆனால், இதில் ட்விஸ்ட் என்னவென்றால் இந்த நிறுவன தயாரிப்பில் உருவாகும் புதிய படத்திற்கு சாய் அபயங்கர் இசையமைக்க இணைந்துள்ளாரா? அல்லது ஹீரோவாக நடிக்க இணைந்துள்ளாரா? என்பது தெரியவில்லை. அவர் ஆல்பம் பாடல்களில் நடனமாடி வந்தாலும் படங்களில் இப்போதைக்கு நடிக்க மாட்டேன் என கூறி வருகிறாராம். அப்படி பார்க்கையில் அவர் ஏஜிஎஸ் நிறுவனத்தின் படத்திற்கு இசையமைக்கலாம் என கூறப்படுகிறது.