வாழ்நாள் முழுக்க ஒன்றாக பயணிப்போம் : வதந்திக்கு ராஷ்மிகா முற்றுப்புள்ளி

விஜய் தேவரகொண்டா - ராஷ்மிகா தம்பதி சமீபத்தில் நிகழ்ச்சி ஒன்றில் பங்கேற்றனர். அப்போது திருமணம் பற்றி யார் முதலில் பேசினீர்கள் என்ற கேள்வி எழுந்தது. அதற்கு விஜய் தேவரகொண்டா ‛‛திருமணம் செய்ய சொல்லி 100 முறை ராஷ்மிகா கெஞ்சினார். அதன்பிறகே சம்மதித்தேன்'' என விளையாட்டாக சொன்னார். ஒரு பெண்ணை இப்படியா கெஞ்ச வைப்பது என பலரும் விஜய் தேவரகொண்டாவை விமர்சித்தனர். மேலும் விஜய் தேவரகொண்டா தனது இன்ஸ்டாவில் ராஷ்மிகாவை பாலோ செய்யாமல் இருக்க, இருவருக்கும் பிரச்னை, விவாகரத்து செய்யப் போகிறார்கள் என செய்திகள் கிளம்பின. இதற்கு முற்றுப்புள்ளி வைக்கும் விதமாக ராஷ்மிகா வெளியிட்ட அறிக்கையின் சுருக்கம் இதோ...

என்னையும் விஜ்ஜுவையும்(விஜய் தேவரகொண்டா) சுற்றியுள்ள விவகாரம் தேவையற்ற விமர்சனங்களையும் எதிர்மறைக் கருத்துகளையும் உருவாக்கியுள்ளது. பொதுவாக நான் இதுபோன்ற விஷயங்களுக்கு விளக்கம் அளிப்பதில்லை; ஏனென்றால் அனைவருக்கும் கருத்து சொல்ல உரிமை உண்டு. ஆனால், எங்களது நேர்காணல் குறித்து தற்போது நிலவும் பரபரப்பு, மக்கள் கருத்து தெரிவிப்பது போலத் தெரியவில்லை; தங்கள் கோபத்தைத் தீர்த்துக்கொள்ள யாரையாவது தேடும் ஒரு ஆவேசக் கூட்டத்தைப் போலவே தோன்றுகிறது. எங்களது நேர்காணலின் உண்மையான நோக்கத்தைப் புரிந்துகொள்ளாமல் பலரும் கருத்து தெரிவிக்கின்றனர்.

திருமணம் குறித்த முடிவை எடுக்க நாங்கள் இருவரும் ஒருவரையொருவர் புரிந்துகொள்ளத் தேவையான நேரத்தை எடுத்துக்கொண்டோம். இறுதியில், இருவரும் ஒருவரையொருவர் தேர்ந்தெடுத்தோம். எங்களைப் பொறுத்தவரை, திருமணம் என்பது ஆடம்பரமான காதல் வெளிப்பாடுகள் அல்ல; ஒன்றாக இணைந்து வாழ்க்கையையும் எதிர்காலத்தையும் உருவாக்குவதாகும்.

​எனக்கு என்ன வேண்டும் என்பதில் நான் தெளிவாக இருந்தேன். அதேபோல், வாழ்க்கையின் எதார்த்தமான நடைமுறைகளை யோசித்து முடிவெடுக்க அவருக்கு அவகாசம் தேவைப்பட்டது. அது எங்கள் காதலை எந்த விதத்திலும் மாற்றவில்லை. எங்களைப் பொறுத்தவரை, திருமணம் என்பது ப்ரொபோசல் செய்வதோ, மண்டியிடுவதோ அல்லது விரலில் மோதிரம் போடுவதோ அல்ல. அதெல்லாம் வெறும் வெளிப்புற அலங்காரங்கள் மட்டுமே. எங்களைப் பொறுத்தவரை, திருமணம் என்பது ஒன்றாக இணைந்து ஒரு வாழ்க்கையையும் எதிர்காலத்தையும் உருவாக்குவது.

​நான் திருமணம் செய்துகொள்ளப் போகும் மனிதரை நான் மனதாரக் காதலிக்கவில்லை என்றால், பிறகு எதற்காக நான் அவரைத் திருமணம் செய்ய வேண்டும்? அவரை மனதாரக் காதலிக்கிறேன். அவருடன் வாழ்நாள் முழுவதும் பயணிக்க விரும்புகிறேன். எனக்குத் தோழனாக, வருங்காலத்தில் எனது பிள்ளைகளுக்கு தந்தையாக இருக்கப் போகிறார். எங்கள் காதல், மற்றவர்களின் கற்பனைக்கு ஏற்ப இருக்க வேண்டிய அவசியமில்லை. எங்கள் வாழ்க்கையை எவ்வாறு வாழ வேண்டும் என்பதைத் தீர்மானிக்கும் உரிமை எங்களுக்கு உண்டு. நாங்கள் ஒருவரையொருவர் தேர்ந்தெடுத்துள்ளோம்; வாழ்நாள் முழுவதும் அப்படியே தொடர்வோம். ஒவ்வொருவரும் தங்களுக்கான உண்மையான காதலைக் கண்டறிய வேண்டும் என்பதே எனது விருப்பம்.

இவ்வாறு ராஷ்மிகா தெரிவித்துள்ளார்.