சொட்ட சொட்ட நனையுது

தயாரிப்பு : அட்லர் என்டர்டெயின்ட்மென்ட்
இயக்கம் : நவீத் எஸ்.ப்ரீத்
நடிப்பு : நிஷாந்த் ரூசோ, ஷாலினி, வர்ஷினி வெங்கட், ரோபோ சங்கர்,
இசை : ரஞ்சித் உன்னி
ஒளிப்பதிவு : ரயீஸ்
வெளியான தேதி : ஆகஸ்ட் 29, 2025
நேரம் : 2 மணிநேரம் 07 நிமிடம்
ரேட்டிங் : 2 / 5

காரைக்குடியில் வசிக்கும் ஹீரோ நிஷாந்த் ரூசோவுக்கு திருமணம் நடக்காமல் தள்ளிப்போய்க் கொண்டே போகிறது. அவரை பார்க்கும் பெண்கள் 'அய்யய்யோ இவரா' என அலறுகிறார்கள். காரணம், நிஷாந்துக்கு வழுக்கை தலை. அதையும் மீறி பக்கத்து வீட்டு பெண்ணுடன் திருமணம் நடக்க இருந்த வேளையில், ஒரு தவறான வீடியோ காரணமாக அதுவும் நின்று விடுகிறது. விரக்தி அடையும் ஹீரோ சென்னை சென்று விக் வைத்து வழுக்கை இருப்பதை மறைத்து, வர்ஷினி வெங்கட்டை திருமணம் செய்ய முயற்சிக்கிறார். அதற்கும் பல தடைகள். கடைசியில் வழுக்கை தலை ஹீரோவுக்கு திருமணம் நடந்ததா? இல்லையா? இதுதான் சொட்ட சொட்ட நனையுது கதை.

ஹீரோவின் வழுக்கையும், அதனால் ஏற்படும் பிரச்னைகளும்தான் கதைக்கரு. ஸ்பெஷல் மேக்கப் மூலம் வழுக்கை தலை ஆளாக மாறி, நடித்த ஹீரோவின் ஈடுபாட்டை பாராட்டலாம். ஆனாலும், வழுக்கைக்கு மட்டும் முக்கியத்துவம் கொடுத்து பல காட்சிகளில் சுமாராக நடித்து இருக்கிறார் நிஷாந்த். உணர்ச்சிவசப்பட வேண்டிய இடங்களில், கோபப்படுகிற இடங்களில் கூட அவர் நடிப்பு சுமார். காதல் காட்சிகளில், திருமண காட்சிகளில் இன்னும் சுமார். முதற்பாதியில் ஹீரோயினாக வருகிற ஷாலினி சில காட்சிகளில் ரசிக்க வைக்கிறார். பிற்பாதியில் ஹீரோயினாக வருகிற வர்ஷினி வெங்கட் ரீல்ஸ் மோகத்தில் தவிப்பவராக ஓவர் ஆக்டிங் கொடுத்து இருக்கிறார். காமெடி என்ற பெயரில் ஹீரோவின் நண்பர்கள், குடும்பத்தினர், ஏன் ரோபோ சங்கரும் சோதனை கொடுக்கிறார்கள்.

ஹீரோ அம்மா, அப்பா, ஹீரோயின் பாட்டி கேரக்டர், நடிப்பு பக்கா நாடகத்தனம். பாசம் என்ற பெயரில் அவர்கள் அடிக்கும் கூத்துகளும் படத்தின் பெரிய மைனஸ். வழுக்கையை சரி செய்ய வரும் டாக்டர் சம்பந்தப்பட்ட சீன்கள் மட்டும் ஓரளவு ஆறுதல். அந்த திருமண வீடு பாடல் மட்டும் ஓகே ரகம். ஹீரோ திருமணத்தை நிறுத்தவரும் போட்டோகிராபர் விஜய் புகழ் எதையாவது செய்வார் என எதிர்பார்த்தால், அவரும் ஏதேதோ டயலாக் பேசி, காமெடி என்ற பெயரில் நேரத்தை வீணடிக்கிறார்.

திருமணவீடு காட்சிகளை கலர்புல்லாக காண்பித்து இருக்கிறார் ஒளிப்பதிவாளர் ரயீஸ். இசையமைப்பாளர் ரஞ்சித் உன்னி வேலைகள் ஈர்க்கவில்லை. பக்கம், பக்கமாக பல கேரக்டர்கள் பேசிக் கொண்டே இருப்பதும், திரைக்கதையில் விறுவிறுப்பு, திருப்பங்கள் இல்லாததும் நெளிய வைக்கிறது.

திருமணத்துக்கு எத்தனையோ தடைகள் வரும். குறிப்பாக, ஆண்களுக்கு சொட்ட தலை இருந்தால் என்னென்ன பிரச்னைகள் வரும். அவர்களின் மனப்போராட்டம் எப்படி இருக்கும். அதை தடுக்க ஆண்கள் என்னவெல்லாம் செய்வார்கள் என்ற அழகான கரு. ஏகப்பட்ட நடிகர்கள் நடித்து இருக்கிறார்கள். ஆனால், சுமாராகவும், சில சமயம் போராடிக்கிற மாதிரியும் எடுத்து பொறுமையை சோதித்து இருக்கிறார் இயக்குனர்.

சொட்ட சொட்ட நனையுது - 'தலை' தப்பினால் போதும்னு ஓடுகிற நிலை.