மீனாட்சி கோயில் வீரவசந்தராய மண்டபம் புனரமைப்பு

மதுரை: மதுரை மீனாட்சி அம்மன் கோயிலில் 2018ல் நடந்த தீ விபத்தில் சேதமடைந்த வீரவசந்தராய மண்டபத்தை புனரமைக்க அரசு ரூ.18.10 கோடி நிதி ஒதுக்கியுள்ளது.

2018 பிப்., 2ல் நடந்த தீ விபத்தில் சேதமடைந்த வீரவசந்தராய மண்டபம் முழுவதும் போட்டோ, வரைபடங்களாக ஆவணப்படுத்தப்பட்டு, அதன் அடிப்படையில் வேலைக்குரிய வரைபடங்கள் தயார் செய்யப்பட்டது. தமிழக சிற்பக் கலைஞர்கள், ஐ.ஐ.டி., வல்லுனர்களை ஈடுபடுத்தி பழைய தன்மை, கலையழகு மாறாத வகையில் மீண்டும் புனரமைக்கப்பட உள்ளது. மண்டப கட்டுமானங்களை சீரமைக்க நாமக்கல் மாவட்டம் பட்டிணம் கிராமத்தில் உள்ள கல்குவாரி தேர்வு செய்யப்பட்டது. இதற்கு அரசு அனுமதி அளித்து ரூ.18.10 கோடி நிதி ஒதுக்கியுள்ளது. இப்பணிகள் விரைவில் துவங்கி இரண்டு ஆண்டுகளில் முடியும். அடுத்த குடமுழுக்கு விழாவில் பக்தர்கள் பார்வைக்கு மண்டபம் திறக்கப்படும் என தக்கார் கருமுத்து கண்ணன் தெரிவித்துள்ளார்.