திருமலை தேவஸ்தானத்தில் மே மாத சேவைகளுக்கு முன்பதிவு அறிவிப்பு

சென்னை; திருமலை, திருப்பதி வெங்கடேஸ்வர பெருமாள் கோவிலில், தினசரி அதிகாலை முதல் நள்ளிரவு வரை பல சேவைகள் நடக்கின்றன. அவற்றில், வரும் மே மாதம் நடக்கவுள்ள சேவைகளுக்கான முன்பதிவு தேதிகள் அறிவிக்கப்பட்டுள்ளன.

ஸ்ரீவாரி ஆர்ஜித சேவை எலக்ட்ரானிக் குலுக்கலுக்கு, வரும் 20ம் தேதி காலை 10:00 மணி வரை முன்பதிவு நடக்கிறது. கல்யாண உத்சவம், ஊஞ்சல் சேவை, ஆர்ஜித பிரம்மோத்சவம், சகஸ்ர தீப அலங்கார சேவைகளுக்கு, 21ம் தேதி காலை 10:00 மணிக்கு முன்பதிவு துவங்குகிறது. ஆன்-லைன் வாயிலான கல்யாண உத்சவம், ஊஞ்சல்சேவை, ஆர்ஜித பிரம்மோத்சவம், சகஸ்ர தீப அலங்கார சேவைகள் முன்பதிவு, 21ம் தேதி மாலை 3:00 மணிக்கு துவங்குகிறது. அங்கப்பிரதக்‌ஷணம் செய்வதற்கான முன்பதிவு வரும், 23ம் தேதி காலை 10:00 மணிக்கு துவங்குகிறது. மூத்த குடிமக்கள், மாற்றுத்திறனாளிகள் முன்பதிவு, அன்று மாலை 3:00 மணிக்கு துவங்குகிறது. மே மாத சிறப்பு தரிசனம், 300 ரூபாய் கட்டணத்துக்கான முன்பதிவு, வரும், 24ம் தேதி காலை 10:00 மணிக்கு துவங்குகிறது. அன்று மாலை 3:00 மணிக்கு, திருமலை மற்றும் திருப்பதியில் தங்கும் விடுதிகளுக்கான முன்பதிவு துவங்குகிறது என, திருமலை திருப்பதி தேவஸ்தானம் அறிவித்துள்ளது.