திருப்புல்லாணியில் வேதாந்த மகா தேசிகன் 758வது அவதார தினம்

திருப்புல்லாணி: திருப்புல்லாணி ஆதி ஜெகநாத பெருமாள் கோயில் அருகே பழமையும் புரதான சிறப்பும் பெற்ற ஆண்டவன் ஆசிரமம் உள்ளது. இங்கே பகவத் ராமானுஜருக்கு பிறகு தோன்றிய பெரிய வைணவ ஆச்சாரியரும், திருப்பதி சீனிவாச பெருமாளின் திருமணி அவதாரமும், ஹயக்ரீவர் பெருமாளின் முழு அனுக்கிரகமும் பெற்றவருமான வேதாந்த தேசிகனின் அவதார தின விழா மூன்று நாட்கள் நடந்தது. 758 வது அவதார தினத்தை முன்னிட்டு உற்ஸவ மூர்த்திகளுக்கு விசேஷத் திருமஞ்சனம் சாற்றுமுறை கோஷ்டி பாராயணம் உள்ளிட்டவைகள் நடந்தது. தரிசனம் செய்த பக்தர்களுக்கு 11 வகையான பிரசாதங்கள் வழங்கப்பட்டது. திவ்ய பிரபந்த தேசிக பாடல்களை பாடியவாறு திருப்புல்லாணி நான்கு ரத வீதிகளிலும் புறப்பாடு நடந்தது. ஆதி ஜெகநாத பெருமாள் கோயிலில் இருந்து மகா தேசிகன் சுவாமிக்கு சிறப்பு பூஜை நடந்தது. விழாவிற்கான ஏற்பாடுகளை ஆண்டவன் சுவாமி நியமனப்படி கோயில் நிர்வாகத்தினர் செய்திருந்தனர்.