திருத்தணி முருகன் மலைக்கோவிலில் இளைப்பாறும் மண்டபம் இடித்து அகற்றம்

திருத்தணி: திருத்தணி முருகன் மலைக்கோவில் தேர் வீதியில் இருந்த அம்மா இளைப்பாறும் மண்டபத்தை, நேற்று முன்தினம் இரவு, கோவில் நிர்வாகம் இடித்து அகற்றியது.

திருத்தணி முருகன் மலைக்கோவிலுக்கு, தினமும் பல்லாயிரக்கணக்கான பக்தர்கள் வந்து, மூலவரை தரிசித்து செல்கின்றனர்.

இந்நிலையில், கடந்த 2016ம் ஆண்டு, அ.தி.மு.க., ஆட்சியின் போது, அப்போதைய தக்கார் ஜெய்சங்கர், மலைக்கோவில் தேர் வீதியில் பக்தர்கள் அமர்ந்து செல்வதற்கு வசதியாக, கோவில் நிர்வாகம் மூலம், அம்மா இளைப்பாறும் மண்டபம் கட்டி பயன்பாட்டிற்கு கொண்டு வந்தார்.

இந்நிலையில், ராஜகோபுரத்தில் இருந்து தேர் வீதியை இணைக்கும் பகுதியில், புதிய கோபுரம் கட்டுவதற்கும், கோபுரம் வழியாக இருபுறமும் படிகள் அமைக்கவும் தீர்மானித்து, அதற்கான பணிகள் நடந்து வருகின்றன.

இந்த கோபுரத்திற்கு இடையூறாக இருந்த அம்மா இளைப்பாறும் மண்டபம், ஹிந்து அறநிலைய துறையின் ஆணையர் அனுமதி பெற்று, கோவில் இணை ஆணையர் ரமணி முன்னிலையில், நேற்று முன்தினம் இரவு, பொக்லைன் இயந்திரம் மூலம் இடித்து அகற்றப்பட்டது.

இந்த மண்டபம் இடிக்கப்பட்டதால், மலைக்கோவிலில் பத்து நாட்களுக்கு, தங்கத்தேர், வெள்ளித் தேர், வெள்ளி மயில் வாகனம், அன்ன வாகனம் போன்ற சேவைகள் ரத்து செய்யப்பட்டுள்ளதாக, கோவில் இணை ஆணையர் ரமணி தெரிவித்தார்.