மாடம்பாக்கம் சிவாலயங்களில் இன்று சிவராத்திரி

மாடம்பாக்கம்: மாடம்பாக்கம், தேனுபுரீஸ்வரர் கோவிலில் இன்று சிவராத்திரி பூஜைகள் நடக்கின்றன. சேலையூரை அடுத்த, மாடம்பாக்கம் பகுதியில், பல்லவர் காலத்து பழமையான தேனுபுரீஸ்வரர் கோவில் உள்ளது. இன்று சிவராத்திரியை முன்னிட்டு, கோவிலில் நான்கு கால சிறப்பு பூஜைகள் நடைபெறுகின்றன.இரவு, 9:00 மணிக்கு, முதல் கால பூஜையை அடுத்து, நள்ளிரவு, 12:00 மணிக்கு, இரண்டாம் கால பூஜை நடைபெறுகிறது.பின், 2:00 மணிக்கு, மூன்றாம் காலமும், அதிகாலை, 4:00 மணிக்கு, நான்காம் கால பூஜைகளும் நடைபெற உள்ளன. குரோம்பேட்டையில் இருந்து சிட்லபாக்கம், ராஜகீழ்ப்பாக்கம் வழியாக மாடம்பாக்கத்திற்கு சிற்றுந்து சேவையும் துவக்கப்பட்டுள்ளது. மேலும் விவரங்களுக்கு, 9841210813 என்ற எண்ணில் தொடர்பு கொள்ளலாம்.

திருவொற்றியூர்: திருவொற்றியூர் வடிவுடையம்மன் கோவிலில், மகா சிவராத்திரியை ஒட்டி, திருவொற்றீஸ்வரருக்கு, இன்று, நான்கு கால பூஜைகள் நடக்கின்றன. இரவு, 9:00, 11:00, அதிகாலை, 2:00, 4:00 மணிகளில், அந்த பூஜைகள் நடைபெறும். அதில், சந்தனாதி தைலம், நல்லெண்ணெய், பழ வகைகள், பஞ்சாமிர்தம், பசும்பால், தயிர், இளநீர், சந்தனம், பன்னீர் மற்றும் அரிசி, மஞ்சள், திரவிய பொடிகளால், ஒவ்வொரு கால பூஜைக்கும், சுவாமிக்கு அபிஷேகம் நடத்தப்பட்டு, தீபாராதனை காட்டப்படும். இரவு, 11:00 மணிக்கு மேல், ஆதிபுரீஸ்வருக்கு, 108 சங்காபிஷேகம் நடக்கும்.

மேலும், சிவபுரம் ஐயா தம்பிரான் தோழர் கபிலனாரின் சிவராத்திரி சிறப்புரை, ஆடிய பாதம் தேடிய சொந்தம் குழுவின் சிவராத்திரி நாடகம் மற்றும் நாட்டியாஞ்சலி போன்ற நிகழ்ச்சிகள் நடக்க உள்ளன.