பழநி மலைக்கோயில் செல்லும் ரோப்காருக்கு புதுபெட்டிகள்

பழநி : பழநி மலைக்கோயில் செல்லும் ரோப் காருக்கு கரூர் மாவட்டத்தில் இருந்து எட்டு புதிய பெட்டிகள் வந்துள்ளன. பழநி மலைக்கோயிலுக்கு மூன்று நிமிடங்களில் எளிதாக சென்று வரும் வகையில் நாள்தோறும் ரோப்கார் இயக்கப்படுகிறது. காலை 7 மணி முதல் இரவு 9 மணி வரை இயங்கும். மாதந்திர பராமரிப்பு பணிகளுக்காக மாதத்தில் ஒருநாளும், ஆண்டு பராமரிப்பு பணிகளுக்காக ஒருமாதமும் நிறுத்தப்படுகிறது. அதன்படி நேற்று மாதாந்திர பணிகளுக்காக நிறுத்தப்பட்டு உருளைகள், கம்பி வடத்தில் கிரீஸ், ஆயில் இடும்பணி நடந்தது. கரூர் மாவட்டத்தில் இருந்து வந்துள்ள 8 புதிய பெட்டிகள் கம்பிவடத்தில் பொருத்தப்பட்டன. பின் குறிப்பிட்ட அளவு எடைக்கற்களை வைத்து, சோதனை ஓட்டம் நடத்தப்பட்டது. இதன் மூலம் பக்தர்களின் பாதுகாப்பான பயணம் உறுதிசெய்யப்பட்டது. இதையடுத்து இன்றுமுதல் பக்தர்கள் பயன்பாட்டுக்கு ரோப்கார் இயக்கப்படும் என, கோயில் அதிகாரிகள் தெரிவித்தனர்.