பாலக்காடு மணப்புள்ளிக்காவு அம்மன் கோவில் திருவிழா

பாலக்காடு: கேரள மாநிலம், பாலக்காடு மணப்புள்ளிக்காவு அம்மன் கோவில் திருவிழா, நேற்று யானைகள் அணிவகுப்புடன், விமரிசையாக நடந்தது. நேற்று அதிகாலை 3:00 மணிக்கு கோவில் நடை திறக்கப்பட்டு, மகா கணபதி ஹோமம், அம்மனுக்கு அபிஷேக- ஆராதனைகள் நடந்தன. தொடர்ந்து, காலை, 10:00 மணிக்கு, மூலஸ்தான கோவில் அமைந்துள்ள படிஞ்சாரை யாக்கரை கோவிலிருந்து, அம்மன் எழுந்தருளல் நடந்தது. மாலை 4:00 மணிக்கு, பஞ்சவாத்தியங்கள் முழங்க, அம்மன் யானை மீது அமர்ந்து வீதியுலா வந்தார். தொடர்ந்து, பாலக்காடு கோட்டை மைதானத்தில், 15 யானைகளின் அணிவகுப்பு மற்றும் வண்ணக் குடைமாற்றம் நிகழ்ச்சி நடந்தது. ஆயிரக்கணக்கான பக்தர்கள் கண்டு மகிழ்ந்தனர். இரவு வாண வேடிக்கை நடந்தது.