நெல்லுக்கு பதில் குதிரைவாலி மதுரை 1 ரகம்

மதுரை விவசாய கல்லுாரியின் பயிர் இனப்பெருக்க மற்றும் மரபியல் துறை சார்பில், துறைத்தலைவர் வன்னியராஜனின் ஒன்பதாண்டு கால ஆராய்ச்சியில் குதிரைவாலி மதுரை 1 ரகம் 2017ல் கண்டறியப்பட்டு, வேளாண் பல்கலை மூலம் வெளியிடப்பட்டது. 2018ல் விதை உற்பத்திக்கு அங்கீகாரம் வழங்கப்பட்டது.தற்போது மதுரை மற்றும் பிற மாவட்டங்களில் பரவலாக பயிரிடப்பட்டு வருகின்றன.மதுரை 1 குதிரைவாலி ரகம் குறித்து துறைத்தலைவர் வன்னியராஜன் கூறியது :2009ல் குதிரைவாலி ரக ஆராய்ச்சி தொடங்கினோம். இந்த ரகம் 90 - 95 நாட்கள் பயிராகவும் உவர் மண்ணிலும் வளரும் தன்மையுள்ளது. வறட்சி மற்றும் கடும் மழையைத் தாங்கும். பயிர்கள் திரட்சியாக, விதை பெரிதாக உள்ளது. இதனால் அரவை மில்லில் சுத்தம் செய்யும் போது, புறத்தோல் முழுமையாக அகன்று விடும். சிறு தானியத்திற்குரிய கசப்புத்தன்மை இதில் இருக்காது. முறைப்படி சுத்தம் செய்தால் கிலோ ரூ. 80 முதல் ரூ.200 வரை விற்கலாம்.இந்த குதிரைவாலி தானியம் தயிர்சாதமாக சாப்பிடுவதற்கேற்ற ரகமாக உள்ளது. இதில் இரும்புச்சத்து அதிகமாக உள்ளதால், தினமும் உணவில் சேர்த்துக் கொண்டால் ரத்தசோகை குறைந்துவிடும். இதை மனையியல் கல்லுாரி ஆராய்ச்சி துறையின் மூலம் நிரூபித்துள்ளோம்.இட்லிமாவில் அரிசியில் ஒருபங்கை குறைத்து விட்டு குதிரைவாலியை சேர்த்துக் கொண்டால், உடலுக்கு தேவையான சத்து கிடைக்கும். அதுதவிர பிஸ்கெட், குக்கீஸ் ஆகவும் சமைத்து சாப்பிடலாம். தற்போது 90 நாள் பயிராக உள்ளது. இதை 60 நாட்களில் அறுவடை செய்யும் வகையில், ஆராய்ச்சியைத் தொடர்ந்துள்ளோம் என்றார்.குதிரைவாலி மதுரை 1 ரகத்தை தற்போது பயிரிட்டு அறுவடை செய்துள்ள, கல்லுாரியின் வேளாண் இளநிலை அலுவலர் சந்திரசேகரன், தனது வயல் அனுபவங்களை விவரிக்கிறார்.அலங்காநல்லுார் சம்பக்குளம் பகுதியில் 3 ஏக்கரில் குதிரைவாலி மதுரை 1 ரகத்தை பயிரிட்டேன். ஒரு ஏக்கருக்கு 400 கிலோ விதையை துாற்றும் முறையில் துாவினேன். மானாவாரி முறையில்லாமல், கிணற்றுப்பாசனம் மூலம் விதை துாவிய முதல்நாள், 5ம் நாள், 15ம் நாள், 23 ம் நாள் தண்ணீர் பாய்ச்சினேன். 90 நாள் பயிருக்கு மொத்தம் ஒன்பது முறை தண்ணீர் பாய்ச்சியுள்ளேன். நெல் விளைந்த இடத்தில் 25 ஆண்டுகள் கழித்து இத்தானியத்தை பயிரிட்டுள்ளேன். 29ம் நாள் ஒருமுறை தான் களை எடுத்தேன். தண்ணீர் பாய்ச்சுதலும் குறைவு. உரச் செலவும் இல்லை. நோய் தாக்குதலும் மிகக்குறைவு.தானியமாக விற்றால் கிலோ ரூ.25க்கு தான் வியாபாரிகள் வாங்குவார்கள். நேரடியாக விவசாய கல்லுாரியில் இருந்து விதையை வாங்கி நட்டுள்ளதால், வேளாண் துறை விதை உற்பத்தி மையத்தில் பதிந்துள்ளேன். எனவே, விதையாக விற்கும் போது கிலோவிற்கு ரூ.65 கிடைக்கும். ஏக்கருக்கு ஒரு டன் குறையாது என்பதால், 90 நாட்களில் அதிக பராமரிப்பின்றி, நல்ல லாபம் கிடைக்கிறது என்றார்.இந்த விதைகள் மதுரை விவசாய கல்லுாரியில் விற்கப்படுகின்றன.-கு.ஆனந்த், உதவி பேராசிரியர் பயிர் மரபியல் துறைவிவசாய கல்லுாரி, மதுரை.