ஆங்கில புத்தாண்டு கொண்டாட்டம் பெங்., போலீசார் விதிமுறை வெளியீடு

பெங்களூரு: ஆங்கில புத்தாண்டு கொண்டாட்டத்தில், எந்த விதமான அசம்பாவிதங்களும் நடக்காமல் தடுக்க, பெங்களூரு போலீசார் விதிமுறைகள் வகுத்துள்ளனர். பார்ட்டிகள், நிகழ்ச்சிகளில் பங்கேற்போர், இவற்றை பின்பற்ற வேண்டும் என, உத்தரவிட்டுள்ளனர்.பெங்களூரு போலீசார் வெளியிட்ட விதிமுறை: புத்தாண்டை அமைதியான முறையில் கொண்டாட வேண்டும். சட்டம், விதிமுறைகளை பின்பற்றுங்கள். விதிமுறைப்படி வாகனம் ஓட்டுங்கள். போக்குவரத்து விதிமுறைகளை பின்பற்றுங்கள். அமைதி, ஒழுங்கை காப்பாற்ற போலீஸ் அதிகாரிகள், ஏட்டுகளுடன் பொது மக்கள் ஒத்துழைப்பு தாருங்கள். போலீசார் மற்றும் உள்ளாட்சி அதிகாரிகள், அதிகாரப்பூர்வமாக அனுமதி அளித்த இடங்களில் மட்டும், புத்தாண்டு கொண்டாடுங்கள். அவசர சந்தர்ப்பங்களில், 112 அல்லது அருகில் உள்ள போலீஸ் நிலையங்களை தொடர்பு கொள்ளுங்கள். புத்தாண்டு கொண்டாட்டத்தின் போது, அக்கம், பக்கத்தினர் பாதுகாப்பில் அக்கறை காட்டுங்கள். அதிக வெளிச்சம் உள்ள இடங்களில் கொண்டாடுங்கள். அதிக மக்கள் நெரிசல் மிகுந்த இடங்களில் விழிப்புடன் இருங்கள். சட்டவிரோத செயல்கள் நடப்பது தெரிந்தால், உடனடியாக போலீசாருக்கு தகவல் தாருங்கள். புத்தாண்டு கொண்டாடும் இடங்களில், பெண்கள், சிறார்கள் விலை உயர்ந்த நகைகளை அணியாமல் இருப்பது நல்லது. மொபைல் போன் மற்றும் பணத்தை பாதுகாப்பாக வைத்து கொள்ளுங்கள். மற்ற மதத்தவருக்கு பாதிப்பு ஏற்படாமல், புத்தாண்டு கொண்டாடுங்கள். பாதுகாப்பு பணியில் ஈடுபட்டுள்ள போலீசார், ஊர்க்காவல் படையினருக்கு ஒத்துழைப்பு தாருங்கள். ஆட்டோ, வாடகைக் காரில் பயணிக்கும் போது, பாதுகாப்பானதா என்பதை உறுதிப்படுத்தி கொள்ளுங்கள். போலீசார் சுட்டி காட்டிய சாலைகளிலேயே பயணிக்க வேண்டும்.

செய்ய கூடாதவை

 மதுபானம் அருந்தி, போதைப்பொருள் பயன்படுத்தி வாகனம் ஓட்ட கூடாது. அது சட்டவிரோதம். உயிருக்கு ஆபத்தை விளைவிக்கலாம். பட்டாசுகள் வெடிக்கக் கூடாது. சுற்றுச்சூழல் பாழாவதை தவிருங்கள்.* தேவையின்றி சத்தமாக ஹார்ன் அடிக்க கூடாது.* அதிவேகமாக, அலட்சியமாக வாகனம் ஓட்ட கூடாது.* போலீசார் மற்றும் உள்ளாட்சி நிர்வாகத்திடம், அனுமதி பெறாத இடங்களில் நிகழ்ச்சிகள் நடத்த கூடாது.* வயதானவர்கள், நோயாளிகளுக்கு தொந்தரவு ஏற்படாமல், புத்தாண்டு கொண்டாடுங்கள். போலீஸ் பேரிகேட்களை தாண்ட கூடாது. புத்தாண்டு கொண்டாட்டத்தில், குழப்பத்தை ஏற்படுத்த கூடாது. தடை செய்யப்பட்ட பகுதிகளில் நுழையாதீர்கள். பொது இடங்களில் சிகரெட் புகைப்பது சட்டவிரோதம். பொது இடங்களில் தேவையின்றி, கூட்டம் சேராதீர்கள். கொண்டாட்டத்தின் போது, தெரு விளக்கு உட்பட, பொது சொத்துகளை சேதப்படுத்த கூடாது. சமுதாயத்தின் அமைதியை குலைக்க கூடாது. புத்தாண்டு கொண்டாட்டத்தின் போது, அறிமுகம் இல்லாதோரிடம் பேசவோ, வாக்குவாதம் செய்யவோ கூடாது.