சாகச பிரியர்களுக்கு பிடித்தமான இசட் பாயின்ட்

சிக்கமகளூரு மாவட்டம், கெம்மன்ஹுன்டியில் இருந்து 5 கி.மீ., தொலைவில் உள்ளது 'இசட் பாயின்ட்'. கடல் மட்டத்தில் இருந்து 1,500 மீட்டர் உயரம் இருக்கும் இந்த மலையை, தொலைவில் இருந்து பார்த்தால் 'இசட்' வடிவில் தென்படும். அதனாலேயே இதற்கு 'இசட் பாயின்ட்' என்று பெயரிட்டு உள்ளனர்.இந்த மலைக்கு சென்றால், அமைதியான சூழலில் உங்கள் மனதை இளைப்பாற வைக்கலாம். ஓய்வெடுப்பது மட்டுமின்றி, பல சாகச செயல்களையும் உணர முடியும். 'அட்வென்சர்' பிரியர்களுக்கு சிறந்த இடமாக அமையும். மேலும், இயற்கையை விரும்புவோர், நடந்தபடியே கண்களை கவர்ந்திழுக்கும் காட்சிகளை காணலாம்.சிக்கமகளூரு சுற்றுப்பயணத்தில் குறுகிய மலையேற்ற திருப்தியை இந்த 'இசட் பாயின்ட்' நிச்சயம் அளிக்கும். பள்ளத்தாக்குகள், செங்குத்தான மலைகளால் சூழப்பட்டு உள்ளது. மலை உச்சியில் இருந்தபடி மாலையில் சூரியன் அஸ்தமனத்தை காணும் போது, வார்த்தைகளால் விவரிக்க முடியாத உணர்வு ஏற்படும்.கெம்மன்ஹுன்டி ராஜ்பவனில் இருந்து 3 கி.மீ., துாரமுள்ள சவாலான மலையேற்றம் துவங்குகிறது. செல்லும் வழியில், சாந்தி நீர் வீழ்ச்சியை காணலாம். அங்கு குளித்து, புத்துணர்ச்சி பெறலாம்.இதன் பின்னரே, சவாலான, கடினமான பாதையை எதிர்கொள்ள நேரிடும். இவை அனைத்தும் மலையேறிய பின், நீங்கள் பார்க்கும் காட்சி, உங்கள் கடின உழைப்புக்கு மதிப்பளிப்பதாக இருக்கும்.இங்கு செல்ல விரும்புவோர், டிசம்பரில் இருந்து மார்ச் மாதத்துக்குள் செல்லலாம். இந்த காலகட்டத்தில், இப்பகுதியின் சீதோஷ்ண நிலை, 14 டிகிரி செல்ஷியசில் இருந்து, 22 டிகிரி செல்ஷியசாக இருக்கும். ஜூனில் இருந்து செப்டம்பர் மாதம் வரை மழை காலம் என்பதால், மலையின் அழகை உங்களாக ரசிக்க முடியாது.

ஜீப்பில் செல்ல ரூ.600

இந்த மலையேற்றத்துக்கு கட்டணம் எதுவும் இல்லை. ஆனால், ஜீப்பில் செல்ல வேண்டுமானால், ஒருவருக்கு 600 ரூபாயும்; செக்போஸ்டில் 100 ரூபாயும் கட்டணம் செலுத்த வேண்டும். காலை 8:00 மணி முதல் மாலை 5:00 மணி வரை அங்கு சென்று வரலாம்.

டிராவல் டிப்ஸ்

1 டிரெக்கிங் செல்பவர்கள் அதற்கு ஏற்ற காலணி அணிந்து கொள்ளவும்2 தொப்பி, கூலிங் கிளாஸ் அணிந்து கொள்ளவும்3 எப்போது பசி, தாகம் எடுக்கும் என்று தெரியாது. எனவே, உணவு, குடிநீரை நீங்களே எடுத்து செல்லுங்கள்.

எப்படி செல்வது?

பெங்களூரில் இருந்து விமானத்தில் செல்வோர் ஷிவமொகா விமான நிலையத்துக்கு சென்று, அங்கிருந்து பஸ், டாக்சியில் கெம்மன்ஹுன்டிக்கு செல்ல வேண்டும். அங்கிருந்து ஆட்டோ அல்லது ஜீப்பில் இசட் பாயின்டுக்கு செல்லலாம்.ரயிலில் செல்வோர் தரிகெரே ரயில் நிலையத்துக்கு செல்ல வேண்டும். அங்கிருந்து 30 கி.மீ., தொலைவில் உள்ள கெம்மன்ஹுண்டி செல்லலாம். பஸ்சில் செல்வோர் கெம்மன்ஹுன்டி பஸ் நிலையத்தில் இறங்கி, அங்கிருந்து செல்லலாம். - நமது நிருபர் -