டில்லி உஷ்ஷ்ஷ்: உருது மொழியால் பிரச்னை!

மும்பை: மஹாராஷ்டிரா தேர்தல் பிரசாரத்தில், உருது மொழி ஒரு பிரச்னையை கிளப்பியுள்ளது. மறைந்த சிவசேனா தலைவர் பால் சாகிப் தாக்கரே தீவிர ஹிந்து; காங்கிரசை கடுமையாக எதிர்த்தவர். இவருடைய மகன் உத்தவ் தாக்கரே, பா.ஜ., கூட்டணியிலிருந்து விலகி, காங்., ஆதரவுடன் மஹாராஷ்டிரா முதல்வரானார்; பின், இவருடைய கட்சி இரண்டாக உடைந்தது.'ஏக்நாத் ஷிண்டே தலைமையிலான அதிருப்தி அமைப்பு உண்மையான சிவசேனா' என, தேர்தல் கமிஷன் அறிவித்து விட்டது. தற்போது, ஏக்நாத் ஷிண்டே பா.ஜ., ஆதரவில் முதல்வராக உள்ளார். உத்தவ் தாக்கரே கட்சியினர், உருது மொழியில் ஒரு காலண்டர் அச்சடித்துள்ளனர்; அதில், ஜனாப் பால் தாக்கரே என, பாலா சாகிப் படத்தை போட்டுள்ளனர். இதை, தேர்தல் பிரசாரத்தில் பேசிய பா.ஜ., தலைவரும், துணை முதல்வருமான தேவேந்திர பட்னவிஸ், 'இதை ஒரு போதும் பாலா சாகிப் ஒத்துக் கொள்ள மாட்டார்; இது, அவருக்கு உத்தவ் செய்த துரோகம்' என, அவரை கடுமையாக விமர்சித்துள்ளார்.இதற்கு பதில் சொல்ல முடியாமல் தவித்த உத்தவ், 'இந்த காலண்டரை நான் அச்சடிக்க சொல்லவில்லை. கட்சியில் யாரோ செய்துள்ளனர்' என, மறுப்பு தெரிவித்துள்ளார். ஆனாலும், பா.ஜ., இதை தீவிர பிரசாரமாக்கி உள்ளது.