மரம் விழுந்து 2 கார், பைக் சேதம்
புதுச்சேரி: புதுச்சேரியில் நேற்று முன்தினம் பலத்த காற்று மற்றும் இடியுடன் கூடிய கனமழை பெய்தது. அதில், 5.34 செ.மீட்டர் மழை பதிவாகி இருந்தது. இதனால் வாகன ஓட்டிகள், பொதுமக்கள் கடும் சிரமத்திற்குள்ளாகினர். இந்நிலையில், காந்தி வீதி- கந்தப்ப முதலியார் வீதி சந்திப்பில் நேற்று காலை திடீரென சாலையோரம் இருந்த மரம் ஒன்று வேருடன் முறிந்து சாலையின் குறுக்கே விழுந்தது. மரத்தின் கீழ் நிறுத்தப்பட்டிருந்த 2 கார்கள், பைக் சேதமடைந்தது. தகவலறிந்த தீயணைப்பு வீரர்கள் விரைந்து வந்து சாலையின் குறுக்கே விழுந்து கிடந்த மரத்தை வெட்டி அப்புறப்படுத்தினர். இதனால், அப் பகுதியில் பரபரப்பு ஏற்பட்டது.