மீனவரை தாக்கிய நால்வருக்கு வலை

புதுச்சேரி : புதுக்குப்பத்தில் மீனவரை தாக்கி, கொலை மிரட்டல் விடுத்த நால்வரை போலீசார் தேடி வருகின்றனர்.தவளக்குப்பம் அடுத்த புதுக்குப்பம் நடுத்தெருவைச் சேர்ந்தவர் லட்சுமணன், 37; மீனவர். இவரது தந்தை செல்வபெருமாள் உட்பட நான்கு பேர் கூட்டாக சேர்ந்து வாங்கிய பைபர் படகை, புதுக்குப்பம் கடற்கரையில் நிறுத்தி வைத்துள்ளனர்.அந்த படகை பார்க்க நேற்று முன்தினம் இரவு லட்சுமணன் சென்றபோது, அதே ஊரைச் சேர்ந்த ராஜவேலு, 36, மற்றும் அவரது நண்பர்கள் 3 பேர் படகு மீது அமர்ந்து மது குடித்தனர். இதை தட்டிக்கேட்ட லட்சுமணனை, ராஜவேலு உட்பட நால்வரும் தாக்கி, கொலை மிரட்டல் விடுத்தனர். புகாரின் பேரில் தவளக்குப்பம் போலீசார் வழக்குப் பதிந்து ராஜவேலு உட்பட நால்வரை தேடி வருகின்றனர்.