ஸ்மிருதி மந்தனா நம்பர்-2 * ஐ.சி.சி., பேட்டர் தரவரிசையில்

துபாய்: சர்வதேச கிரிக்கெட் கவுன்சில் (ஐ.சி.சி.,) சார்பில் ஒருநாள் போட்டியில் சிறந்து விளங்கும் வீராங்கனைகளுக்கான தரவரிசை பட்டியல் வெளியானது. பேட்டர் தரவரிசையில் இந்தியாவின் துணைக் கேப்டன் ஸ்மிருதி மந்தனா, 728 புள்ளிகளுடன் முதலிடத்தில் இருந்து 2வது இடத்திற்கு தள்ளப்பட்டார்.இந்தியாவுக்கு எதிரான தொடரில் 160 ரன்கள் எடுத்த இங்கிலாந்தின் நாட் சிவர் பிரன்ட், 731 புள்ளியுடன் மீண்டும் 'நம்பர்-1' இடத்துக்கு முன்னேறினார்.இந்திய அணி கேப்டன் ஹர்மன்பிரீத் கவுர், 10 வது இடம் பிடித்தார். 'மிடில் ஆர்டர்' வீராங்கனை இந்தியாவின் ஜெமிமா, இரு இடம் முந்தி, 13வது இடம் பெற்றார். மற்ற இந்திய வீராங்கனைகள் ரிச்சா 39வது, ஹர்லீன் 48வது இடத்துக்கு முன்னேறினர்.பவுலர் வரிசையில் இந்தியாவின் தீப்தி, நான்காவது இடத்தில் தொடர்கிறார். முதல் மூன்று இடத்தில் இங்கிலாந்தின் சோபி, ஆஸ்திரேலிய வீராங்கனைகள் ஆஷ் கார்டுனர், மேகன் ஷட் உள்ளனர்.