உள்ளூர் செய்திகள்

/ விளையாட்டு / கிரிக்கெட் / ரோகித்-கோலி கொடி பறக்குமா: இந்தியா-வெஸ்ட் இண்டீஸ் மோதல்

ரோகித்-கோலி கொடி பறக்குமா: இந்தியா-வெஸ்ட் இண்டீஸ் மோதல்

திருவனந்தபுரம்: முதல் ஒருநாள் போட்டியில், அனுபவ ரோகித், கோலி (செல்லமாக ரோ-கோ) அசத்த காத்திருக்கின்றனர்.இந்தியா வந்துள்ள வெஸ்ட் இண்டீஸ் அணி, மூன்று ஒருநாள் போட்டிகள் (செப். 27, 30-கவுஹாத்தி, அக். 3-நியூ சண்டிகர்) கொண்ட தொடரில் பங்கேற்கிறது. முதல் போட்டி இன்று கேரளாவின் திருவனந்தபுரத்தில் உள்ள கிரீன்பீல்டு சர்வதேச மைதானத்தில் நடக்க உள்ளது.ஐ.சி.சி., ஒருநாள் 'ரேங்கிங்' பட்டியலில் இந்தியா 'நம்பர்-1' இடத்தில் உள்ளது. 'சீனியர்' ரோகித் சர்மா, 39, கோலி, 37, வரவு அணிக்கு பலம். 2027ல் நடக்க உள்ள உலக கோப்பை தொடரில் (50 ஓவர்) இருவரும் இடம் பிடிக்க விரும்புகின்றனர். இதற்குள் இந்தியா பங்கேற்க உள்ள 14-20 ஒருநாள் போட்டிகளில் தங்களது திறமையை தொடர்ந்து நிரூபிக்க வேண்டும். யார் துவக்கம்: இன்று துவக்கத்தில் கேப்டன் சுப்மன் கில்-ரோகித் சர்மா வரலாம். ரோகித்-ஜெய்ஸ்வால் கூட்டணி பற்றியும் பரிசீலிக்கலாம். சமீபத்தில் இங்கிலாந்துக்கு எதிரான லார்ட்ஸ் ஒருநாள் போட்டியில் சதம் விளாசிய ரோகித், நல்ல 'பார்மில்' உள்ளார். அடுத்து கோலி, 'கீப்பர்-பேட்டர்' ராகுல், 'ஆல்-ரவுண்டர்' நிதிஷ் குமார் ரெட்டி, ரவிந்திர ஜடேஜா என 'பேட்டிங்' வலுவாக உள்ளது. ஆசிய விளையாட்டில் பங்கேற்க பும்ரா, ஷ்ரேயஸ் ஐயர், இஷான் கிஷான், அக்சர் படேல் உள்ளிட்டோர் ஜப்பான் சென்றுள்ளனர். இதனால், பந்துவீச்சில் சிராஜ், பிரசித் கிருஷ்ணா, குர்னுார் பிரார், ஜடேஜா, குல்தீப் யாதவ் மிரட்டலாம். தொடரும் சோகம்: வெஸ்ட் இண்டீஸ் அணி (ரேங்கிங்-10வது இடம்), சொந்த மண்ணில் நியூசிலாந்து, இலங்கைக்கு எதிரான ஒருநாள் தொடரை இழந்த சோகத்தில் உள்ளது. தவிர, இந்திய மண்ணில் ஒருநாள் தொடரை வென்று 24 ஆண்டுகளாகிறது. ஷாய் ஹோப் தலைமையில் களமிறங்குகிறது. ராஸ்டன் சேஸ், கிரிவ்ஸ், கேம்பல், கார்டி ரன் சேர்க்கலாம். 'ஆல்-ரவுண்டர்' ஷெர்பேன் ரூதர்போர்டு, 'வேகத்தில்' அல்ஜாரி ஜோசப், கீமோ பால், ஜேடன் சீல்ஸ், 'சுழலில்' குடகேஷ் கைகொடுக்கலாம்.யார் ஆதிக்கம்இரு அணிகளும் 142 ஒருநாள் போட்டியில் மோதின. இந்தியா 72, வெ.இண்டீஸ் 64ல் வென்றன. 2 போட்டி 'டை' ஆனது. 4 போட்டிக்கு முடிவு இல்லை. * திருவனந்தபுரத்தில் ஒரு போட்டியில் (2018) மோதின. இதில் வெ.இண்டீஸ் (31.5 ஓவரில் 104 ரன்) அணியை, இந்தியா (14.5 ஓவர், 105/1) 9 விக்கெட் வித்தியாசத்தில் வீழ்த்தியது. * ஆடுகளத்தில் ரன் குவிக்கலாம். போகப் போக 'ஸ்பின்னர்'களுக்கு உதவும். * இன்று மழைக்கு வாய்ப்பு குறைவு.தொடருமா 'உலக' பயணம்கோலி இதுவரை 14,941 ரன் (314 போட்டி) எடுத்துள்ளார். இன்னும் 59 ரன் எடுத்தால், ஒருநாள் அரங்கில் 15,000 ரன்னை எட்டலாம். சச்சினுக்கு (18,426 ரன், 463 போட்டி) அடுத்து, இம்மைல்கல்லை தொட்ட இரண்டாவது இந்திய வீரராகலாம்.கோலி கூறுகையில்,''அடுத்த ஆண்டு நடக்க உள்ள உலக கோப்பை தொடரில் (50 ஓவர்) சாதிக்க தயாராக உள்ளேன். கோப்பை வெல்வதே இலக்கு. இதுவே இந்தியாவுக்காக நான் பங்கேற்கும் கடைசி உலக கோப்பை தொடராக இருக்கும். கேப்டனாக சுப்மன் கில் நிறைய விஷயங்களை கற்று வருகிறார். அணியை சரியான பாதையில் வழிநடத்தி செல்வதில் ஆர்வமாக உள்ளார்,''என்றார்.ஜெய்ஸ்வால் எப்படிஇந்திய அணியின் பேட்டிங் பயிற்சியாளர் சிதான்ஷு கோடக் கூறுகையில்,''துவக்கத்தில் ரோகித்-சுப்மன் கில்லுக்கு தான் முன்னுரிமை அளிக்கப்படும். ஜெய்ஸ்வால் சிறந்த பேட்டர் தான். தனது வாய்ப்புக்காக காத்திருக்க வேண்டும். பயிற்சியின் போது வலது முழங்கை பகுதியில் காயம் அடைந்த சுப்மன் தேறிவிட்டார். முழு உடற்தகுதியுடன் உள்ளார். இன்று களமிறங்குவார்,''என்றார்.


தினமலர் சேனல்களுக்கு SUBSCRIBE செய்யுங்கள் !

வாசகர்கள் கருத்துகள் ( 1 )

Dv Nanru
செப் 27, 2026 22:35

விராட் கோலி சர்வதேச கிரிக்கெட் உலகின் மிகச்சிறந்த நவீனத்துவ பேட்டர்களில் ஒருவராகவும், இந்திய கிரிக்கெட்டின் மாபெரும் தூணாகவும் திகழ்கிறார். விறுவிறுப்பான, சுறுசுறுப்பான நமது விராட் கோலி பற்றி ஒரு அலசல் ஆரம்பக் காலம்: 2008-ஆம் ஆண்டு இந்திய 19-வயதிற்குட்பட்டோர் U-19 அணியின் கேப்டனாக உலகக்கோப்பையை வென்று கொடுத்து, அதே ஆண்டில் இந்திய தேசிய அணியில் அறிமுகமானார். சாதனை நாயகன்: ஒருநாள் சர்வதேச போட்டிகளில் ODI அதிவேகமாக 10,000, 11,000, 12,000 மற்றும் 13,000 ரன்களைக் கடந்த வீரர் என்ற பெருமைக்குரியவர். சச்சின் டெண்டுல்கரின் 49 ஒருநாள் சதங்கள் சாதனையை முறியடித்து, ஒருநாள் போட்டிகளில் 50 சதங்கள் அடித்த முதல் வீரர் என்ற வரலாற்றுச் சாதனையைப் படைத்துள்ளார். உடற்தகுதி மற்றும் மன உறுதி: இந்திய கிரிக்கெட் அணியில் உடற்தகுதிப் பண்பாட்டை Fitness Culture முற்றிலும் புரட்சி செய்தவர். களத்தில் இவரது சுறுசுறுப்பும், வெற்றி பெற வேண்டும் என்ற தீவிரமான வெறியும் Aggression உலகளவில் இவருக்குப் பல மில்லியன் ரசிகர்களைப் பெற்றுத் தந்துள்ளது. சேஸ் மாஸ்டர் Chase Master: இலக்குகளை விரட்டிப் பிடித்து Run Chase அணியை வெற்றி பெற வைப்பதில் இவருக்கு நிகர் இவரே. அழுத்தமான தருணங்களிலும் நிதானமாகவும் அதிரடியாகவும் ஆடி அணியை வெற்றியை நோக்கி அழைத்துச் செல்வதில் வல்லவர். தலைமைப் பண்பு: இந்திய அணியின் கேப்டனாகச் செயல்பட்டு டெஸ்ட் போட்டிகளில் இந்தியாவை உலகின் முதன்மை அணியாக மாற்றிய பெருமை இவருக்கு உண்டு. வெளிநாடுகளில் குறிப்பாக ஆஸ்திரேலியா, இங்கிலாந்து போன்ற நாடுகளில் வரலாற்றுச் சிறப்புமிக்க டெஸ்ட் வெற்றிகளைப் பெற்றுத் தந்துள்ளார். விராட் கோலியின் அர்ப்பணிப்பும், ஓயாத உழைப்பும் வரவிருக்கும் போட்டிகளிலும் அவரை மேலும் பல சாதனைகளைப் படைக்க வைக்கும் என்பதில் ஐயமில்லை. சோதனைக் காலத்திலும் சாதனை படைத்தவர் அவரை வாழ்த்துகிறேன் மேன்மேலும் பல சாதனைகளைப் படைக்க வாழ்த்துகிறேன். இதில் மிக முக்கியமானது என்னவென்றால், பல ஆண்டு காலமாக போராடிக் கொண்டிருந்தது RCB ஒரு முறை கூட கோப்பையை "வெல்ல" முடியவில்லை. அந்தப் குறையையும் நிறைவேற்றி வைத்தவர் நம்முடைய கிங் கோலி.


சமீபத்திய செய்தி