ஐ.எஸ்.எல்., கால்பந்து: மும்பை அணி ஏமாற்றம்

ஜாம்ஷெட்பூர்: இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. ஜாம்ஷெட்பூரில் நடந்த லீக் போட்டியில் 'நடப்பு சாம்பியன்' மும்பை, ஜாம்ஷெட்பூர் அணிகள் மோதின. ஆட்டத்தின் 18வது நிமிடத்தில் மும்பையின் கரேலிஸ் ஒரு கோல் அடித்தார். இதற்கு, ஜாம்ஷெட்பூரின் ஜோர்டான் முர்ரே (36வது நிமிடம்), ஜாவி ஹெர்னாண்டஸ் (44வது) தலா ஒரு கோல் அடித்து பதிலடி கொடுத்தனர். முதல் பாதி முடிவில் மும்பை அணி 1-2 என பின்தங்கி இருந்தது.இரண்டாவது பாதியின் 50வது நிமிடத்தில் ஜாம்ஷெட்பூரின் ஜாவி ஹெர்னாண்டஸ் மீண்டும் ஒரு கோல் அடித்தார். தொடர்ந்து போராடிய மும்பை அணிக்கு 77வது நிமிடத்தில் யோல் வான் நீப் ஒரு கோல் அடித்து ஆறுதல் தந்தார். ஆட்டநேர முடிவில் ஜாம்ஷெட்பூர் அணி 3-2 என்ற கணக்கில் வெற்றி பெற்றது.முதல் போட்டியில் கோவா அணியை வீழ்த்திய ஜாம்ஷெட்பூர், தொடர்ச்சியாக 2வது வெற்றியை பதிவு செய்தது.