ஆசிய ஹாக்கி: அரையிறுதியில் இந்தியா

மஸ்கட்: ஜூனியர் ஆசிய கோப்பை ஹாக்கி அரையிறுதிக்கு இந்திய பெண்கள் அணி முன்னேறியது. கடைசி லீக் போட்டியில் தீபிகா, கனிகா 'ஹாட்ரிக்' கோல் அடித்து கைகொடுக்க 9-0 என தாய்லாந்தை வென்றது.ஓமனில், ஜூனியர் (19 வயது) பெண்களுக்கான ஆசிய கோப்பை ஹாக்கி 9வது சீசன் நடக்கிறது. மொத்தம் 10 அணிகள், இரண்டு பிரிவுகளாக லீக் சுற்றில் மோதின. இந்திய அணி 'ஏ' பிரிவில் இடம் பெற்றிருந்தது. முதலிரண்டு போட்டியில் வங்கதேசம், மலேசியாவை வென்ற இந்தியா, 3வது போட்டியில் சீனாவிடம் தோல்வியடைந்தது.கடைசி லீக் போட்டியில் இந்தியா, தாய்லாந்து அணிகள் மோதின. துவக்கத்தில் இருந்து ஆதிக்கம் செலுத்திய இந்திய அணிக்கு சாக்சி ராணா (17வது நிமிடம்), கனிகா (23, 25வது), லால்ரின்புய் (27வது), தீபிகா (28வது) கோல் அடித்து கைகொடுத்தனர். முதல் பாதி முடிவில் இந்திய அணி 5-0 என முன்னிலையில் இருந்தது.இரண்டாவது பாதியிலும் இந்திய வீராங்கனைகள் அசத்தினர். தீபிகா (31, 35, 55வது நிமிடம்), கனிகா (40வது) மீண்டும் கோல் அடித்து கைகொடுத்தனர். ஆட்டநேர முடிவில் இந்திய அணி 9-0 என்ற கோல் கணக்கில் வெற்றி பெற்றது.லீக் சுற்றில் 4 போட்டியில், 3 வெற்றி, ஒரு தோல்வி என 9 புள்ளிகளுடன் இந்திய அணி 'ஏ' பிரிவில் 2வது இடம் பிடித்து அரையிறுதிக்கு முன்னேறியது. சீனா (12 புள்ளி) முதலிடத்தை கைப்பற்றியது. 'பி' பிரிவில் ஜப்பான் (12 புள்ளி), தென் கொரியா (9) முதலிரண்டு இடத்தை தட்டிச் சென்றன.அரையிறுதியில் (டிச. 14) ஜப்பான்-இந்தியா, சீனா-தென் கொரியா அணிகள் மோதுகின்றன.