யு.எஸ்., ஓபன்: காலிறுதியில் ஜோகோவிச்

நியூயார்க்: யு.எஸ்., ஓபன் டென்னிஸ் காலிறுதிக்கு செர்பியாவின் ஜோகோவிச், ஸ்பெயினின் அல்காரஸ், பெலாரசின் சபலென்கா உள்ளிட்டோர் முன்னேறினர்.நியூயார்க்கில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது.ஆண்கள் ஒற்றையர் பிரிவு 4வது சுற்றில் செர்பியாவின் நோவக் ஜோகோவிச், ஜெர்மனியின் ஜான்-லெனார்டு ஸ்டிரப் மோதினர். போட்டியின் போது கழுத்து, வலது தோள்பட்டை பகுதியில் ஏற்பட்ட வலிக்கு முதலுதவி எடுத்துக் கொண்ட ஜோகோவிச் 6-3, 6-3, 6-2 என்ற நேர் செட் கணக்கில் வெற்றி பெற்றார். கிராண்ட்ஸ்லாம் அரங்கில் 64வது முறையாக காலிறுதிக்கு முன்னேறினார். தவிர இவர், ஒரு சீசனின் 4 கிராண்ட்ஸ்லாம் தொடரிலும் காலிறுதிக்கு முன்னேறிய மூத்த வீரரானார் (38 வயது).மற்ற 4வது சுற்று போட்டிகளில் ஸ்பெயினின் கார்லஸ் அல்காரஸ் 7-6, 6-3, 6-4 என, பிரான்சின் ஆர்தர் ரின்டர்க்கென்கை வீழ்த்தினார். அமெரிக்காவின் டெய்லர் பிரிட்ஸ் 6-4, 6-3, 6-3 என செக்குடியரசின் தாமஸ் மச்சாக்கை தோற்கடித்தார்.சபலென்கா வெற்றி: பெண்கள் ஒற்றையர் பிரிவு 4வது சுற்றில் உலகின் 'நம்பர்-1' பெலாரசின் அரினா சபலென்கா, ஸ்பெயினின் கிறிஸ்டினா புக்சா மோதினர். இதில் சபலென்கா 6-1, 6-4 என்ற நேர் செட் கணக்கில் வெற்றி பெற்று காலிறுதிக்குள் நுழைந்தார்.மற்ற 4வது சுற்று போட்டிகளில் அமெரிக்காவின் ஜெசிகா பெகுலா 6-1, 6-2 என, சகவீராங்கனை ஆன் லியை வீழ்த்தினார். செக்குடியரசின் பார்போரா கிரெஜ்சிகோவா 1-6, 7-6, 6-3 என, அமெரிக்காவின் டெய்லர் டவுன்சென்ட்டை தோற்கடித்தார். கஜகஸ்தானின் எலினா ரிபாகினா 4-6, 7-5, 2-6 என செக்குடியரசின் மார்கெடா வான்ட்ரூசோவாவிடம் தோல்வியடைந்தார்.இந்திய ஜோடி ஏமாற்றம்ஆண்கள் இரட்டையர் 2வது சுற்றில் இந்தியாவின் அனிருத் சந்திரசேகர், விஜய் சுந்தர் பிரஷாந்த் ஜோடி 4-6, 3-6 என பிரேசிலின் பெர்னாண்டோ ராம்போலி, ஆஸ்திரேலியாவின் ஜான்-பாட்ரிக் ஸ்மித் ஜோடியிடம் தோல்வியடைந்தது.மாயா அபாரம்ஜூனியர் பெண்கள் ஒற்றையர் முதல் சுற்றில் இந்தியாவின் மாயா ரேவதி, சீனாவின் ஜாங்-கியான் வெய் மோதினர். இதில் மாயா 7-6, 6-3 என்ற நேர் செட் கணக்கில் வெற்றி பெற்றார்.* ஜூனியர் ஆண்கள் ஒற்றையர் முதல் சுற்றில் இந்தியாவின் ஹிதேஷ் சவுகான், கிரிஷ் தியாகி தோல்வியடைந்தனர்.