செயல்முறை கிடங்கு செய்யூரில் பூமி பூஜை

செய்யூர், செய்யூர் பகுதியில் தண்ணீர்பந்தல் கிராமத்திற்குச் செல்லும் சாலையோரத்தில், 1,000 மெட்ரிக் டன் கொள்ளளவு கொண்ட 2 நுகர்பொருள் வாணிப கழக செயல் முறை கிடங்குகள் செயல்பட்டு வருகின்றன.தற்போது செயல்படும் செயல்முறை கிடங்கில், போதிய அளவு பொருட்களை சேமித்து வைக்க முடியாத நிலை உள்ளதால், சில இடங்களில் நியாய விலைக் கடைகளில் பொது வினியோகம் பாதிக்கப்படுகிறது.கூடுதலாக புதிய செயல்முறை கிடங்கு அமைக்க வேண்டும் என, நீண்ட நாட்களாக கோரிக்கை எழுந்து வந்தது. இந்நிலையில், தமிழ்நாடு நுகர்பொருள் வாணிபக் கழகம் சார்பாக 1.70 கோடி ரூபாயில், 1,000 மெட்ரிக் டன் கொள்ளளவு கொண்ட புதிய செயல்முறை கிடங்கு அமைக்க முடிவு செய்யப்பட்டு, கடந்த சில நாட்களுக்கு முன் தனியாருக்கு 'டெண்டர்' விடப்பட்டது.இதையடுத்து, தற்போது செயல்படும் செயல்முறை கிடங்கிற்கு அருகே, புதிய செயல்முறை கிடங்கு அமைக்க, நேற்று பூமி பூஜை நடந்தது.