டாஸ்மாக்கால் போக்குவரத்து நெரிசல் வேறு பகுதிக்கு மாற்ற எதிர்பார்ப்பு

திருப்போரூர்:திருப்போரூர் அடுத்த கொட்டமேடு கிராமத்தில், சாலையை ஒட்டி டாஸ்மாக் கடை செயல்பட்டு வருகிறது.இந்த டாஸ்மாக் கடைக்கு வருவோர், கொட்டமேடு- - கூடுவாஞ்சேரி சாலையில் இருசக்கர வாகனங்களை நிறுத்திவிட்டு, மது வாங்க கடைக்குச் செல்கின்றனர்.இதனால், சாலையின் அளவு குறைந்து பேருந்து, வேன், லாரி போன்ற கனரக வாகனங்கள் செல்ல முடியாமல், போக்குவரத்து நெரிசல் ஏற்படுகிறது.டாஸ்மாக் கடையை மையப்படுத்தி செயல்பட்டு வரும் சில உணவுக் கடைகள் போன்றவற்றாலும், மேற்படி சாலையில் போக்குவரத்து நெரிசல் ஏற்பட்டு வருகிறது.குறிப்பாக, இரவு நேரத்தில் அதிக அளவில் சிறு சிறு விபத்துக்கள் நடக்கின்றன. அவ்வழியாக நடந்து செல்லும் பொதுமக்கள், பள்ளி மாணவ, மாணவியரும் பாதிக்கப்படுகின்றனர்.எனவே, கொட்டமேடு டாஸ்மாக் கடையை வேறு பகுதிக்கு மாற்ற வேண்டும் என, பகுதிவாசிகள் மற்றும் வாகன ஓட்டிகள் கோரிக்கை விடுத்துள்ளனர்.