கால்நடை மருத்துவ படிப்புகள் இன்று விண்ணப்ப பதிவு

சென்னை:இளநிலை கால்நடை மருத்துவப் படிப்புகளுக்கான இணைய வழி விண்ணப்ப பதிவு, இன்று துவங்குகிறது. தமிழ்நாடு கால்நடை மருத்துவ அறிவியல் பல்கலையின் கீழ் செயல்படும் கல்லுாரிகளில், ஐந்தரை ஆண்டு கால கால்நடை மருத்துவம் மற்றும் பராமரிப்பு படிப்பு, பி.வி.எஸ்சி., ஏ.ஹெச்., மற்றும் நான்கு ஆண்டு உணவுத் தொழில்நுட்பம், பால்வளத் தொழில்நுட்பம், கோழியின தொழில்நுட்பம் ஆகிய பி.டெக்., படிப்புகள் உள்ளன. பி.வி.எஸ்சி., ஏ.ஹெச்., மற்றும் பி.டெக்., படிப்புகளுக்கு, 2024 - -25ம் ஆண்டுக்கான மாணவர் சேர்க்கைக்கு https://adm.tanuvas.ac.inஎன்ற இணையதளத்தில், இன்று காலை 10:00 மணி முதல் வரும் 21ம் தேதி மாலை 5:00 மணி வரை விண்ணப்பிக்கலாம். அயல்நாடு வாழ் இந்தியர், அயல்நாடு வாழ் இந்தியரின் வாரிசுகள், அயல்நாடு வாழ் இந்தியரின் நிதி ஆதரவு பெற்றோர் மற்றும் அயல்நாட்டினர் ஆகியோருக்கான இட ஒதுக்கீடு, இணையதள விண்ணப்ப வழிமுறைகள் மற்றும் இதர விபரங்களையும், இணையதளத்தில் பார்த்து அறிந்து கொள்ளலாம்.இந்த படிப்புகளுக்கு, பிளஸ் 2 மதிப்பெண் அடிப்படையில் மாணவர் சேர்க்கை நடைபெறுவது குறிப்பிடத்தக்கது.