மாநில அளவிலான கபடி அணிக்கு கோவை அரசு பள்ளி மாணவன் தேர்வு

கோவை,:இந்திய பள்ளி விளையாட்டு கூட்டமைப்பின், மாநில அளவிலான கபடி அணிக்கு, கோவை மாணவர் தேர்வு செய்யப்பட்டார்.இந்திய பள்ளி விளையாட்டு கூட்டமைப்பு சார்பில், மாநில அளவிலான கபடி அணிக்கான தேர்வு, காங்கேயம் நாதகாடையூர், பில்டர்ஸ் இன்ஜினியரிங் கல்லுாரியில், நேற்று முன்தினம் நடந்தது.இதில் பல்வேறு மாவட்டங்களை சேர்ந்த, 500க்கும் மேற்பட்ட மாணவர்கள் பங்கேற்றனர். கோவை மாவட்டத்தில் இருந்து, பல்வேறு பள்ளிகளை சேர்ந்த மாணவர்கள் பங்கேற்றனர். கோவை குனியமுத்துார் அரசு மேல்நிலைப்பள்ளியில் இருந்து, மூன்று மாணவர்கள் இத்தேர்வில் பங்கேற்றனர். 14 வயதுக்குட்பட்டோர் பிரிவில், பள்ளியின் மாணவர் முகமது ஹக்சல் மாநில அணிக்கு தேர்வு பெற்றார்.பள்ளியின் உடற்கல்வி ஆசிரியர் அங்குத்தாய் கூறுகையில், ''பல்வேறு பகுதிகளில் இருந்தும் ஏராளமான மாணவர்கள் தேர்வில் பங்கேற்றனர். 19, 17, 14 வயதுக்கு உட்பட்டோருக்கான போட்டிகள் நடந்தன. இதில், 14 வயது பிரிவில் முகமது ஹக்சல் திறமையை வெளிப்படுத்தி தேர்வு பெற்றுள்ளார்,'' என்றார்.