கல்லுாரிகளுக்கு இடையே டேபிள் டென்னிஸ் இரு பிரிவிலும் பி.எஸ்.ஜி., கல்லுாரி முதலிடம்

கோவை;கல்லுாரிகளுக்கு இடையேயான 'டேபிள் டென்னிஸ்' போட்டியில் மாணவர், மாணவியர் என இரு பிரிவுகளிலும் பி.எஸ்.ஜி., கல்லுாரி அணி முதலிடம் பிடித்தது.ஸ்ரீ கிருஷ்ணா கலை அறிவியல் கல்லுாரியில் பாரதியார் பல்கலைக்கு உட்பட்ட கல்லுாரிகளுக்கு இடையேயான 'டேபிள் டென்னிஸ்' போட்டி கடந்த இரு நாட்கள் நடந்தது. நேற்று முன்தினம் மாணவர்களுக்கு நடந்த போட்டியில், 20 அணிகள் பங்கேற்றன. 'நாக் அவுட்' அடுத்து நடந்த 'லீக்' சுற்றின் முடிவில், பி.எஸ்.ஜி., கல்லுாரி அணி முதலிடத்தை தட்டிசென்றது. கொங்கு கல்லுாரி இரண்டாம் இடத்தையும், ஸ்ரீ கிருஷ்ணா கலை அறிவியல் கல்லுாரி மூன்றாம் இடத்தையும், பாரதியார் பல்கலை நான்காம் இடத்தையும் பிடித்தது. நேற்று மாணவியருக்கான போட்டியில், 18 அணிகள் பங்கேற்றன. 'நாக் அவுட்' அடுத்து நடந்த 'லீக்' சுற்றின் முதல் ஆட்டத்தில், பி.எஸ்.ஜி., கலை அறிவியல் கல்லுாரி அணி, ஸ்ரீ கிருஷ்ணா கலைக் கல்லுாரி அணியை, 3-0 என்ற செட் கணக்கில் வென்றது.தொடர்ந்து, பி.எஸ்.ஜி., கிருஷ்ணம்மாள் கல்லுாரி அணி, 3-2 என்ற செட் கணக்கில் உடுமலை ஜி.வி.ஜி., கல்லுாரி அணியையும், பி.எஸ்.ஜி., கலை அறிவியல் கல்லுாரி அணி, 3-0 என்ற செட் கணக்கில் பி.எஸ்.ஜி., கிருஷ்ணம்மாள் கல்லுாரி அணியையும் வென்றது.ஸ்ரீ கிருஷ்ணா கல்லுாரி அணி, 3-2 என்ற செட் கணக்கில் ஜி.வி.ஜி., கல்லுாரி அணியையும், பி.எஸ்.ஜி., கிருஷ்ணம்மாள் கல்லுாரி அணி, 3-0 என்ற செட் கணக்கில் ஸ்ரீ கிருஷ்ணா கல்லுாரி அணியையும், பி.எஸ்.ஜி., கலை அறிவியல் கல்லுாரி அணி, 3-0 என்ற செட் கணக்கில் ஜி.வி.ஜி., கல்லுாரி அணியையும் வீழ்த்தியது.முடிவில், பி.எஸ்.ஜி., கலை அறிவியல் கல்லுாரி அணி முதலிடத்தையும், பி.எஸ்.ஜி., கிருஷ்ணம்மாள் கல்லுாரி அணி இரண்டாம் இடத்தையும், ஸ்ரீ கிருஷ்ணா கலை அறிவியல் கல்லுாரி அணி மூன்றாம் இடத்தையும், ஜி.வி.ஜி., கல்லுாரி நான்காம் இடத்தையும் பிடித்தன. வெற்றி பெற்றவர்களுக்கு கல்லுாரி முதல்வர் ஜெகஜீவன் பரிசுகள் வழங்கினார்.