தொடர்கிறது கனமழை வீழ்ந்தது காய்கறி விலை

தொண்டாமுத்தூர்: தொண்டாமுத்தூர் வட்டாரத்தில் சின்ன வெங்காயம், தக்காளி, மஞ்சள், வாழை, தென்னை உள்ளிட்டவை பயிரிடப்படுகிறது. விவசாயிகள், விளை பொருட்களை, தொண்டாமுத்துார், பூலுவபட்டி தினசரி காய்கறி மார்க்கெட்டில் விற்பனை செய்கின்றனர். ஒரு வாரத்திற்கு மேலாக இப்பகுதியில் கனமழை உள்ளது. இதனால் மார்க்கெட்டுகளுக்கு வியாபாரிகளின் வருகை குறைந்துள்ளது; காய்கறி விலையும் வீழ்ந்துள்ளது. பூலுவபட்டி தினசரி காய்கறி மார்க்கெட்டில் நேற்று 15 கிலோ எடையுள்ள ஒரு டிப்பர் தக்காளி, ரூ.450, ஒரு கிலோ பயறு, ரூ.40, கத்தரி, ரூ.5, வெண்டை, ரூ.20, மிளகாய், ரூ.30, முட்டைக்கோஸ், ரூ.10, காலிபிளவர், ரூ.20 விற்பனையானது. தினசரி காய்கறி மார்க்கெட் வியாபாரிகள் கூறுகையில், ‘தொடரும் மழையால், சாலையோர, சந்தை வியாபாரிகளால் கடை அமைக்க முடியவில்லை. அவர்கள் காய்கறி வாங்க வராததால் விற்பனை குறைந்துள்ளது. வெளியூர் காய்கறி வரத்து அதிகரித்துள்ளதும் விலை குறைய காரணம்’ என்றனர்.