பழநி முருகன் கோயில் ஓட்டல் அகற்றம்

பழநி:திண்டுக்கல் மாவட்டம் பழநி முருகன் கோயில் வின்ச் ஸ்டேஷன் மேல் தள பகுதியில் செயல்பட்டு வந்த தனியார் ஓட்டல் பொருட்களை அப்புறப்படுத்தியதால் ஊழியர்கள் உள்ளிருப்பு போராட்டத்தில் ஈடுபட்டனர்.பழநி அடிவாரம் பகுதியில் பக்தர்களின் வசதிக்காக பல்வேறு நடவடிக்கைகளை உயர்நீதிமன்ற மதுரை கிளை உத்தரவின் பெயரில் கோயில் நிர்வாகம், வருவாய் துறையினர் செய்து வருகின்றனர். கிரிவீதி ஆக்கிரமிப்புகள் அகற்றப்பட்டுள்ளன.பழநி கோயில் வின்ச் ஸ்டேஷன் மேல் தளத்தின் அருகில் தனியார் கட்டுப்பாட்டில் 90 ஆண்டுகளுக்கு மேல் ஓட்டல் இயங்கி வருகிறது. நேற்று அதிகாரிகளின் உத்தரவின் பெயரில் ஓட்டலில் இருந்த பொருட்களை கோயில் ஊழியர்கள் வின்ச் மூலம் அடிவாரப் பகுதிக்கு கொண்டு சென்றனர். இதற்கு எதிர்ப்பு தெரிவித்த கடை ஊழியர்கள் உள்ளிருப்பு போராட்டத்தில் ஈடுபட்டனர்.