மாநில ஹேண்ட்பால் போட்டி: சின்னாளபட்டிக்கு வெண்கலம்

சின்னாளபட்டி: மாநில சூப்பர் சீனியர் பிரிவுக்கான ஹேண்ட்பால் போட்டிகளில் சின்னாளபட்டி சேரன் வித்யாலயா பள்ளி மாணவர்கள் வெண்கல பதக்கம் வென்றனர். பள்ளிக்கல்வித்துறை சார்பில் பாரதியார் பிறந்த நாளை முன்னிட்டு திருவண்ணாமலை வேட்டவலம் கல்லுாரியில் 19 வயதிற்கு உட்பட்ட மாணவர்களுக்கான மாநில ஹேண்ட்பால் போட்டிகள் 3 நாட்கள் நடந்தது. இதில் சின்னாளபட்டி சேரன் வித்யாலயா பள்ளி மாணவர்கள் வெண்கல பதக்கம் வென்றனர். இவர்களுக்கான பாராட்டு விழா பள்ளி முதல்வர் திலகம் தலைமையில் நடந்தது. மாநில ஹேண்ட்பால் கழக செயலாளர் சிவக்குமார் பரிசு வழங்கி பாராட்டினார். பள்ளி மேலாளர் பாரதிராஜா, அறக்கட்டளை அறங்காவலர்கள் ஆல்பிரட்யங், அபிஷேக் முன்னிலை வகித்தனர். உதவி தலைமை ஆசிரியர் வெண்ணிலா வரவேற்றார். உடற்கல்வி ஆசிரியர்கள் அசோக்குமார், செந்தில்குமார், ஆரோக்கிய ரஞ்சனி பங்கேற்றனர்.