செம்பரம்பாக்கம் ஏரி நீர் வெளியேற்றம் நிறுத்தம்

குன்றத்துார்: 'டிட்வா' புயலால் எதிர்பார்த்த மழை பெய்யாததால், செம்பரம்பாக்கம் ஏரியில் இருந்து உபரி நீர் வெளியேற்றம் நிறுத்தப்பட்டது. சென்னையின் குடிநீர் ஆதாரமான செம்பரம்பாக்கம் ஏரி, 3.64 டி.எம்.சி., கொள்ளளவும், 24 அடி ஆழமும் கொண்டது. கடந்த மாதம் 21ம் தேதி ஏரி நிரம்பியதையடுத்து, உபரி நீர் திறக்கப்பட்டது. மழை நின்றதையடுத்து, இம்மாதம் 21ம் தேதி ஏரியில் திறந்துவிடப்பட்ட நீர் நிறுத்தப்பட்டது. 'டிட்வா' புயல் காரணமாக, கன மழை பெய்யும் என எதிர்பார்க்கப்பட்டது. முன்னெச்சரிக்கை நடவடிக்கையாக, நேற்று செம்பரம்பாக்கம் ஏரியில் இருந்து, வினாடிக்கு 3,000 கன அடி நீர் வெளியேற்றப்பட்டது. எதிர்பார்த்தபடி நேற்று மழை பெய்யவில்லை. இதனால், நேற்று காலை செம்பரம்பாக்கம் ஏரியில் இருந்து வெளியேற்றப்படும் நீரின் அளவு, 250 கன அடியாக குறைக்கப்பட்டது. அதன்பின், மழை முற்றிலும் குறைந்ததால், நேற்று மாலை உபரிநீர் வெளியேற்றம் முற்றிலும் நிறுத்தப்பட்டு உள்ளது. நேற்றைய நிலவரப்படி, ஏரியின் நீர் மட்டம் 21.20 அடியாகவும், கொள்ளளவு 2.90 டி.எம்.சி.,யாகவும், நீர்வரத்து வினாடிக்கு 1,250 கன அடியாகவும் உள்ளது.