மழைநீர் வடிகால்வாய் ஆக்கிரமிப்பு நெடுஞ்சாலைத்துறையினர் அகற்றம்

காஞ்சிபுரம்: காஞ்சிபுரம் காமராஜர் வீதியில், மழைநீர் வடிகால்வாயை ஆக்கிரமித்து அமைக்கப்பட்டிருந்த சாய்தளத்தை நெடுஞ்சாலைத் துறையினர் நேற்று அகற்றினர். காஞ்சிபுரம் காமராஜர் வீதியில் நெடுஞ்சாலைத் துறை சார்பில், மழைநீர் வடிகால்வாய் அமைக்கப்பட்டுள்ளது. இச்சாலையில் உள்ள வணிக நிறுவனத்தினர் சிலர், தங்களது கடை முன் உள்ள கால்வாயை ஆக்கிரமித்து, மழைநீர் செல்லும் ஓட்டையை அடைத்து கான்கிரீட் சாய்தளம் அமைத்து இருந்தனர். இதனால், கால்வாயில் மழைநீர் செல்லும் ஓட்டையில் அடைப்பு ஏற்பட்டுள்ளதால், காஞ்சிபுரத்தில் நேற்று மழை பெய்தபோது, கால்வாய் வாயிலாக மழைநீர் வெளியேறாமல் சாலையில் தேங்கியது. இதையடுத்து, நெடுஞ்சாலைத் துறையினர், கால்வாயை ஆக்கிரமித்து அமைக்கப்பட்டிருந்த கான்கிரீட் சாய்தளத்தை நேற்று அகற்றினர். கால்வாயில் மழைநீர் செல்லும் ஓட்டையில் மண் துகள்களால் ஏற்பட்டிருந்த அடைப்பை அகற்றினர்.