ரூ.6.84 லட்சத்துக்கு பருத்தி ஏலம்

கிருஷ்ணகிரி, கிருஷ்ணகிரி மாவட்டம், போச்சம்பள்ளி ஒழுங்குமுறை விற்பனை கூடத்தில், இ-நாம் முறையில் நேற்று பருத்தி ஏலம் நடந்தது. பருத்தி அதிகபட்சமாக ஒரு கிலோ, 84.89 ரூபாய், குறைந்தபட்சம், 78.91 ரூபாய், சராசரியாக, 80.29 ரூபாய்க்கு விற்பனையானது. 8,583 கிலோ பருத்தி, 6.84 லட்சம் ரூபாய்க்கு விற்பனையானது.இது குறித்து, போச்சம்பள்ளி ஒழுங்குமுறை விற்பனை கூட கண்காணிப்பாளர் அருள்வேந்தன் கூறுகையில், '' பல்வேறு மாவட்டங்களை சேர்ந்த வியாபாரிகள் கலந்து கொண்டனர். விற்பனை தொகை உடனடியாக விவசாயிகளின் வங்கி கணக்கில் செலுத்தப்பட்டது. விவசாயிகள், கொப்பரை, பருத்தி உள்ளிட்ட பொருட்களை ஒழுங்குமுறை விற்பனை கூடத்தில் விற்பனை செய்து, கூடுதல் வருவாய் பெறலாம். மேலும், நடப்பு பருவத்தில் நெல் ஏலமும் மின்னணு வர்த்தக முறையில் (இ-நாம்) நடக்க உள்ளதால், நெல் விவசாயிகள் இந்த வாய்ப்பை பயன்படுத்தி கொள்ளலாம்,'' என்றார்.