இந்தியன் 2 படத்திற்கு தடை கோரி வழக்கு கமல், சங்கருக்கு நோட்டீஸ்

மதுரை : இந்தியன் 2 திரைப்படத்திற்கு தடை கோரிய வழக்கில் நடிகர் கமல்ஹாசன், இயக்குனர் ஷங்கருக்கு நோட்டீஸ் அனுப்ப மதுரை 4 வது கூடுதல் மாவட்ட முன்சீப் நீதிமன்றம் உத்தரவிட்டது.மதுரை மஞ்சா வர்மக்கலை தற்காப்புக்கலை மற்றும் ஆராய்ச்சி அகாடமியின் ராஜேந்திரன் தாக்கல் செய்த மனு: நடிகர் கமல்ஹாசன் நடிப்பில் இந்தியன் முதல் பாக படத்தில் வர்மக்கலை காட்சிகள் இடம்பெற்றன. படப்பிடிப்பின்போது கமல்ஹாசன், இயக்குனர் ஷங்கருக்கு வர்மக்கலை பயிற்சி அளித்தேன். அதற்காக நன்றி தெரிவித்து படத்தில் எனது பெயர் வெளியிடப்பட்டது. தற்போது இந்தியன் 2 படம் வெளியாக உள்ளது. அதில் வர்மக்கலை முத்திரை இடம் பெற்றுள்ளது. அது எங்களுக்கு சொந்தமானது. முத்திரையை பயன்படுத்த எங்களிடம் அனுமதி பெறவில்லை. படத்தின் டிரைலர் வெளியாகியுள்ளது. நன்றி தெரிவித்து படத்தில் எனது பெயர் இடம்பெறச் செய்ய வேண்டும். படத்தை வெளியிட இடைக்காலத் தடை விதிக்க வேண்டும். இவ்வாறு அவர் குறிப்பிட்டார்.நீதிபதி செல்வமகேஸ்வரி நடிகர் கமல்ஹாசன், இயக்குனர் சங்கர், லைக்கா தயாரிப்பு நிறுவனத்தைச் சேர்ந்த சுபாஷ்கரனுக்கு நோட்டீஸ் அனுப்ப உத்தரவிட்டு ஜூலை 9க்கு ஒத்திவைத்தார்.