நாயகி ஆன பேஷன் டிசைனர் சுஷ்மா நாயர்

த மிழ் சின்னத்திரை உலகில் 'நாயகி' தொடரின் அனன்யா எனும் வில்லி கதாபாத்திரத்தில் நடித்து ரசிகர்களின் மனதில் இடம் பிடித்தவர் சுஷ்மா நாயர். பெங்களூருவை சேர்ந்த இவர், சிறு வயதிலிருந்தே பேஷன் டிசைன் ஆர்வத்தால் எதேச்சையாக தனது திரை வாழ்க்கையைத் தொடங்கி, இன்று 'தமிழும் சரஸ்வதியும்'. 'பட்ஜெட் குடும்பம்', 'இலக்கியா' தொடர்களில் முக்கியப் பாத்திரங்களில் நடித்து வருகிறார். இவர் கூறியதாவது... ஏழாம் வகுப்பு படிக்கும் போதே பேஷன் டிசைனர் ஆக விருப்பம். என் பாட்டிக்கு மராத்தி, கன்னடம் தெரியும். அவருடன் ஹிந்தி சீரியல்கள் பார்க்கும் போது என்னால் நிறைய கலாசாரங்களை பார்த்து, மேக்கப் போட்டு, டிசைன் ஆக ஆடை உடுத்த பிடித்தது. நேஷனல் இன்ஸ்டிடியூட் ஆப் பேஷன் டெக்னாலஜி கல்லுாரியில் சேர ஆசைப்பட்டேன். நுழைவுத்தேர்வில் தோற்றதால் பெங்களூருவில் தனியார் கல்லுாரியில் படித்தேன். கல்வி கட்டணம் செலுத்த அப்பா வங்கி கடன் பெற்றார். கடனை நீ தான் அடைக்க வேண்டும் என்றார். சவாலாக எடுத்து கல்லுாரி நாட்களிலே நானே கம்மல் டிசைன் செய்து விற்பேன். சனி, ஞாயிறுகளில் திறமையை வளர்க்க இன்டர்ன்ஷிப் செய்தேன். என் ஜூனியர் நிதிக்கு பேஷன் டிசைனர் பணி கிடைத்தது. என் ஆர்வத்தை பார்த்து அவள் என்னை பரிந்துரைத்தாள். டிகிரி முடிக்க மீண்டும் என் குடும்பத்தினரிடம் உதவி கேட்கக் கூடாது என நினைத்த எனக்கு இந்த வாய்ப்பு வரப்பிரசாதம். இந்த பணிக்காக ரூ.ஒரு லட்சம் காசோலையை பெற்று பெற்றோரிடம் தந்த போது மகிழ்ச்சி அடைந்தனர். இந்த படிப்பு படித்ததற்கு பெருமைப்பட்டேன். ஒரு திரைப்படத்தில் நடிக்க வேண்டிய நடிகை வரவில்லை. அவருக்கு டிசைன் செய்த உடை என் அளவு தான். என்னையே அந்த கதாபாத்திரத்தில் இயக்குனர் நடிக்க வைத்தார். அது தான் முதல் நடிப்பு அனுபவம். இதில் என்னுடன் பணியாற்றிய சுர்ஜித், தமிழில் சுமங்கலி சீரியலில் நடித்துக் கொண்டிருந்தார். என்னை தமிழ் சீரியலில் நடிக்க அழைத்தார். சினிமாவில் மட்டும் வேலை பார்த்தால் அடுத்த வாய்ப்பு வரை காத்திருக்க வேண்டும். கல்விக் கடனை அடைக்க சீரியலில் நடித்தால் தொடர்ந்து பணம் கிடைக்கும் என முடிவு செய்தேன். அந்த சீரியலில் இன்னொரு நடிகைக்கு பதிலாக நடித்தேன். அடுத்து 'நாயகி' சீரியலில் வாய்ப்பு கிடைத்தது. எனக்கு பிடித்த கதாபாத்திரம் 'நாயகி' அனன்யா. ஒவ்வொரு காட்சியிலும் சுதந்திரத்துடன் நடித்தேன். என் ஆடை, முடி வடிவமைப்பில் நிறைய ஸ்டைல் செய்தேன். நாயகியில் நடிகை அம்பிகா உடன் நடித்தது பாக்கியம். அவரிடம் நடிப்பை விட எனக்கு பேஷன் டிசைனிங்கின் மீது ஆர்வம் என்றேன். துபாயில் நடந்த பேஷன் ஷோவில் பங்கேற்க உதவினார். இன்னொரு நடிகை மெர்சி எனக்கு ஸ்பான்ஸர் பிடித்து தந்தார். இவ்விருவராலும் என் பேஷன் டிசைனிங்கில் மீண்டும் துவக்கம் ஏற்பட்டது. துபாயில் என் காதல் கணவர் லிஜோ தாமஸ் ஜானை சந்தித்தேன். திருமணம் ஆனது. அவர் கிரிக்கெட் அகாடமி பயிற்சியாளராக உள்ளார். தற்போது 'இலக்கியா' சீரியலில் அஞ்சலி கதாபாத்திரம் பாராட்டை பெற்றுள்ளது. கன்னடத்தில் ரைம்ஸ், தமிழில் ஜெஸ்ஸி திரைப்படங்களில் நடித்துள்ளேன். 'பட்ஜெட் குடும்பம்' சீரியலில் மூன்று குழந்தைகளுக்கு அம்மாவாக நடித்தாலும், அந்த கதாபாத்திரத்திற்கு என தனி உலகம் உள்ளது. இது போன்ற சவால் நிறைந்த கதாபாத்திரங்களில் நடிப்பது எனக்கு பிடிக்கும் என்றார். 'பட்ஜெட் குடும்பம்' சீரியலில் மூன்று குழந்தைகளுக்கு அம்மாவாக நடித்தாலும், அந்த கதாபாத்திரத்திற்கு என தனி உலகம் உள்ளது. இது போன்ற சவால் நிறைந்த கதாபாத்திரங்களில் நடிப்பது எனக்கு பிடிக்கும்.