அக்மார்க் முத்திரை இருக்கிறதா கலப்படத்தில் தேவை கவனம்

மதுரை: அரிசி, எண்ணெய், பருப்பு, மாவு வகைகள், மசாலாப் பொருட்கள், தேன், ரவை போன்ற பொருட்களில் கலப்படத்தை தவிர்க்கும் வகையில் அக்மார்க் தரச்சான்று பெற்ற பொருட்களை நுகர்வோர் வாங்கலாம். உணவு உற்பத்தியாளர்கள் நுகர்வோருக்கு தரமான பொருட்களை விற்க வேண்டும் என்ற நம்பிக்கையின் அடிப்படையில் தாமாக முன்வந்து தங்களது உற்பத்திப் பொருட்களை ஆய்வு செய்து அக்மார்க் தரச்சான்றிதழ் பெறுகின்றனர். மதுரையில் பல்வேறு உணவு பொருட்களை உற்பத்தி செய்யும் நுாற்றுக்கும் மேற்பட்டோர் இச்சான்றிதழ் பெற்றுள்ளனர். நுகர்வோரின் நம்பிக்கையைப் பெற தரச்சான்று அவசியம் என்கிறார் மதுரை வேளாண் வணிகம் மற்றும் வேளாண் விற்பனை துணை இயக்குநர் மெர்சி ஜெயராணி. அவர் கூறியதாவது: அக்மார்க் சான்றிதழ் பெற்ற தயாரிப்பாளர்கள் ஒவ்வொரு முறையும் தங்களது பொருட்களை தயாரித்தபின், வேளாண் அலுவலர்கள் நேரில் சென்று உணவு மாதிரிகளை எடுத்து வந்து அக்மார்க் ஆய்வகத்தில் பரிசோதனை செய்வர். அதன் முடிவு சரியாக வந்தால் மட்டுமே அப்பொருளை விற்பனைக்கு அனுப்புவதற்கான லேபிளை தயாரிப்பாளர்களிடம் வழங்குகிறோம். இதனால் பொருளின் தரத்தை நுகர்வோர் உறுதிப்படுத்த முடியும். உதாரணமாக கடுகு எண்ணெயில் அர்ஜிமோன் எண்ணெய் கலப்படத்தையும் தேங்காய் எண்ணெய், கடலை எண்ணெய்யில் மினரல் எண்ணெய் கலப்படத்தையும் இதன் மூலம் தவிர்க்க முடியும். கடலைமாவில் கேசரிபருப்பு, அனுமதியில்லாத மஞ்சள் நிறம், மஞ்சள்பொடியில் காரிய குரோமேட், மெட்டானில் எல்லோ, மிளகாய்ப்பொடியில் மரத்துாள், செங்கல் துாள், கோதுமை மாவில் மணல், நெய்யில் வனஸ்பதி, தேனில் சர்க்கரை பாகு, மிளகில் பப்பாளி விதை கலப்படம் இல்லாமல் உண்மையான பொருளை மட்டுமே நுகர்வோர் வாங்கலாம். விவசாயிகள் ஒருங்கிணைந்து உருவாக்கும் உழவர் உற்பத்தியாளர் நிறுவனங்களும் (எப்.பி.ஓ.,) விளைபொருட்களை மதிப்பு கூட்டி விற்பனை செய்கின்றனர். மதுரையில் 45 எப்.பி.ஓ.,க்கள் அக்மார்க் தரச்சான்று பெற்றுள்ளன. இவர்களுக்கான கட்டண சான்று ரூ.500. மற்ற எப்.பி.ஓ., நிறுவனங்களும் தாமாக முன்வந்து சலுகை கட்டணத்தில் தரச்சான்று பெறலாம் என்றார். எங்கு சான்று பெறுவதுமதுரை மாவட்டத்திற்கான உணவு உற்பத்தியாளர்களின் பொருட்களுக்கு தரநிர்ணயம் செய்வதற்கு மதுரை வடக்கு அக்மார்க் ஆய்வகமும் ராமநாதபுரம், சிவகங்கை, புதுக்கோட்டை மாவட்டங்களைச் சேர்ந்த உணவு தயாரிப்பாளர்களுக்கு மதுரை தெற்கு ஆய்வகமும் செயல்படுகின்றன. அக்மார்க் முத்திரை பெறுவதற்கான கட்டணம் ரூ.10 ஆயிரம். இச்சான்றிதழ் ஐந்தாண்டுகளுக்கு செல்லுபடியாகும். அதன்பின் புதுப்பிக்க ரூ.5000 கட்டணம் செலுத்த வேண்டும். மதுரை வடக்கு 82484 87585, மதுரை தெற்கு 96292 88369 ல் தொடர்பு கொள்ளலாம்.