தி.மு.க., கூட்டணியில் விரிசல் நிச்சயம் அடித்து சொல்கிறார் சீனிவாசன்

மதுரை : ''தி.மு.க., கூட்டணியில் நிச்சயம் விரிசல் ஏற்படும்,'' என, அ.தி.மு.க., பொருளாளர் திண்டுக்கல் சீனிவாசன் கூறினார்.தேவர் ஜெயந்தியை முன்னிட்டு, பசும்பொன் முத்துராமலிங்க தேவர் நினைவிடத்தில் அவரது சிலைக்கு, அ.தி.மு.க., சார்பில், 13.5 கிலோ எடை தங்கக்கவசம், 2014 முதல் அணிவிக்கப்பட்டு வருகிறது.மதுரை அண்ணாநகர் தனியார் வங்கியில் பாதுகாக்கப்பட்டு வரும் அந்த கவசத்தை, கட்சியின் பொருளாளரான திண்டுக்கல் சீனிவாசன் தலைமையில் நேற்று நிர்வாகிகள் பெற்று, தேவர் நினைவிட பொறுப்பாளர் காந்தி மீனாளிடம் ஒப்படைத்தனர்.பின், சீனிவாசன் கூறியதாவது:கூட்டணி என்பது தேர்தல் நேரத்தில் சொல்ல வேண்டியது. எல்லாரும் தனித்து நின்றால், அ.தி.மு.க.,வும் தனித்து நிற்க தயாராக உள்ளது. '2026 தேர்தலில் பழனிசாமி ஆட்சியை பிடிக்க முடியாது' என, தினகரன் கூறுகிறார். அவருக்கும், கட்சிக்கும் சம்பந்தமே கிடையாது. தொண்டன் சொன்னால் கூட ஏற்றுக் கொள்ளலாம். பழனிசாமி, 2026 தேர்தலில் மீண்டும் முதல்வராக நிச்சயம் வருவார்.விஜய் மாநாடு குறித்து பழனிசாமி கூறிவிட்டார்.அதனால், நோ கமென்ட்ஸ்; பெரிய ஜோசியக்காரர் போல ஸ்டாலின் பேசுகிறார். தி.மு.க., கூட்டணியில் என்ன நடக்கும் என்று, 'வெயிட் அண்ட் சீ!' தி.மு.க.,வில் என்ன விவாதம் நடந்தாலும், விரிசல் ஏற்படுவது நிச்சயம்.இவ்வாறு அவர் கூறினார். இதையடுத்து, தங்கக் கவசத்தை, போலீஸ் பாதுகாப்புடன் பசும்பொன் கொண்டு சென்றனர். மதியம் 1:00 மணிக்கு முத்துராமலிங்க தேவர் சிலைக்கு தங்கக்கவசம் அணிவித்து, மாலை மரியாதை செய்தனர்.