வெலிங்டன் மெட்ராஸ் ரெஜிமென்ட் அக்னி வீரர்கள் சத்திய பிரமாணம் கம்பீரமாக நடந்த அணிவகுப்பு சிறந்து விளங்கிய, 11 பேருக்கு பதக்கம்

குன்னுார்; குன்னுார் வெலிங்டன் மெட்ராஸ் ரெஜிமென்ட் சென்டரில் பயிற்சி பெற்ற, 570 'அக்னி' வீரர்கள், நாட்டின் எல்லையில் பணிக்கு செல்ல நேற்று சத்தியப் பிரமாணம் எடுத்து கொண்டனர்.குன்னுார் வெலிங்டன் மெட்ராஸ் ரெஜிமென்ட் சென்டரில் உள்ள அக்னி வீரர்களுக்கு கடந்த, 2022ம் ஆண்டு டிச., 24ல், முதன் முதலாக குழு தேர்வு நடந்தது. தொடர்ந்து, அந்த குழுவினர் நாட்டின் எல்லை பகுதிகளில் பணியாற்றி வருகின்றனர்.தற்போது, 4வது குழுவின், 570 அக்னி வீரர்கள், ஒழுக்கம், தொழில்முறை முக்கிய பண்புகளுடன், 31 வார கடுமையான பயிற்சியை முடித்தனர். அந்த அக்னி வீரர்களுக்கான சத்தியப் பிரமாண நிகழ்ச்சி நேற்று பேரக்ஸ் நாகேஷ் சதுக்கத்தில் நடந்தது.'உப்பிட்டவரை உள்ளளவும் நினை' என்பதன் அடிப்படையில், உப்பு உட்கொண்டு, தேசிய கொடி, பகவத் கீதை, பைபிள், குரான் மீது அக்னி வீரர்கள் சத்தியப்பிரமாணம் செய்தனர். சென்டரின் கமாண்டன்ட் பிரிகேடியர் கிருஷ்ணேந்து தாஸ் அணிவகுப்பு மரியாதையை ஏற்று கொண்டு, பயிற்சியில் சிறந்து விளங்கிய, 11 பேருக்கு பதக்கம் கேடயங்கள் வழங்கினார். இந்த குழுவினர் நாட்டின் எல்லை பகுதிகளில் பணியாற்ற செல்கின்றனர். பெற்றோர் மற்றும் உறவினர்கள், ராணுவ வீரர்கள், அதிகாரிகள் திரளாக பங்கேற்றனர்.