பரமக்குடியில் 82 சதவீத எஸ்.ஐ.ஆர்., பணி நிறைவு: நகராட்சி 72 சதத்துடன் பின்னடைவு

பரமக்குடி: பரமக்குடி 209 (தனி) சட்டசபை தொகுதியில் சராசரியாக 82 சதவீத வாக்காளர் பட்டியல் சிறப்பு தீவிர திருத்த படிவங்கள் திரும்ப பெறப்பட்டுள்ளன. பரமக்குடி நகராட்சியில் 72 சதவீதம் முடிந்த நிலையில் மீதமுள்ளவர்கள் விரைந்து வழங்க கேட்டுக் கொண்டுள்ளனர். வாக்காளர் பட்டியலில் இடம் பெற்றுள்ள அனைத்து வாக்காளர்களிடமும், 2022 தீவிர சிறப்பு திருத்தத்துடன் ஒப்பிட்டு படிவங்கள் பெறப்பட்டு வருகிறது. நவ., 4ல் தொடங்கி வாக்காளர்களிடம் படிவம் வழங்கப்பட்டு, டிச., 4க்குள் திரும்ப ஒப்படைக்க வேண்டும். இதன் படி சட்டசபைக்கு உட்பட்ட பரமக்குடி நகராட்சி, தாலுகா உட்பட கமுதி வட்டம், அபிராமம் பேரூராட்சி ஆகிய சில பகுதிகள் அடங்கியுள்ளன. இதற்கு உட்பட்ட வாக்காளர்களிடம் பி.எல்.ஓ., கள் படிவங்களை வழங்கி உள்ளனர். தொடர்ந்து தாலுகா உள்ளிட்ட இதர பகுதிகளில் 89 சதவீத படிவங்கள் திரும்ப பெறப்பட்டுள்ளது. பரமக்குடி நகராட்சியில் 72 சதவீத படிவங்கள் மட்டுமே திரும்ப பெறப்பட்டுள்ளது. வாக்காளர் திருத்தப் படிவத்தை கையில் வைத்திருப்பவர்கள் உடனடியாக வழங்கிட வேண்டும். மேலும் வெளியூரில் உள்ளவர்கள் உட்பட மாற்று இடங்களில் குடி பெயர்ந்து சென்றவர்கள் யாரேனும் படிவங்களை பெறாமல் இருந்தால், அவர்களும் இப்பணியை செய்து முடிக்க வேண்டும். தொடர்ந்து தேர்தல் ஆணையத்தின் உத்தரவுப்படி, நவ.,4 அன்று அனைத்து படிவங்களையும் திரும்ப ஒப்படைக்க வேண்டுமென, பரமக்குடி ஆர்.டி.ஓ., சரவணபெருமாள் தெரிவித்தார்.