5,000 பால் பண்ணை தொடங்க அரசு ரூ.150 கோடி ஒதுக்கீடு

மேட்டூர், தேசிய பால் தினத்தை ஒட்டி, சேலம் மாவட்டம் மேச்சேரி, புக்கம்பட்டி கூட்டுறவு பால் உற்பத்தியாளர் சங்கத்தில், பால் வளத்துறை அமைச்சர் மனோதங்கராஜ் நேற்று ஆய்வு செய்தார்.இதுகுறித்து அவர் கூறியதாவது: புக்கம்பட்டி கூட்டுறவு சங்கத்தில் விவசாயிகளிடம் குறைகளை கேட்டேன். பெரும்பாலானோர், பால் கொள்முதல் விலையை உயர்த்தி வழங்க கோரினர். படித்த இளைஞர்கள், இளம்பெண்கள், 5,000 பேருக்கு, தலா, 3 லட்சம் ரூபாய் செலவில் சிறு பால் பண்ணைகள் தொடங்க, அரசு, 150 கோடி ரூபாய் ஒதுக்கீடு செய்துள்ளது. அதற்கு வழங்கும் கடனுக்கு, 4 சதவீத வட்டி மானியம் வழங்கப்படும். ஏராளமான விண்ணப்பங்கள் வந்துள்ளன. கூடுதல் விண்ணப்பங்கள் வந்தால், சிறு பால் பண்ணைகள் எண்ணிக்கையை அதிகரிக்க, அரசு முடிவு செய்துள்ளது. இவ்வாறு அவர் கூறினார்.டி.ஆர்.ஓ., ரவிக்குமார், சேலம் எம்.பி., செல்வகணபதி, மேட்டூர் எம்.எல்.ஏ., சதாசிவம் உள்ளிட்டோர் உடனிருந்தனர்.