தண்ணீர் தொட்டியில் மூழ்கி குழந்தை சாவு

வாணியம்பாடி:தண்ணீர் தொட்டியில் தவறி விழுந்த, 3 வயது பெண் குழந்தை உயிரிழந்தது. திருப்பத்துார் மாவட்டம், வாணியம்பாடி அடுத்த புருஷோத்த மகுப்பத்தை சேர்ந்தவர் கோவிந்தசாமி, 34; தொழிலாளி. இவரது, 3 வயது பெண் குழந்தை சந்தியா. கோவிந்தசாமி வீட்டின் முன், 4 அடி ஆழ தண்ணீர் தொட்டி கட்டி வைத்துள்ளார். நேற்று முன்தினம் இரவு, 8:00 மணியளவில் சந்தியா, வீட்டின் முன் விளையாடியபோது, தண்ணீர் தொட்டியில் தவறி விழுந்தார். குடும்பத்தினர் குழந்தையை மீட்டு, வாணியம்பாடி அரசு மருத்துவமனைக்கு கொண்டு சென்றனர். அங்கு பரிசோதித்த டாக்டர்கள் குழந்தை ஏற்கனவே உயிரிழந்ததாக தெரிவித்தனர். வாணியம்பாடி தாலுகா போலீசார் விசாரிக்கின்றனர்.