ரோட்டில் சுற்றித்திரியும் மாடுகளால் விபத்து நகராட்சிக் கூட்டத்தில் கவுன்சிலர்கள் புகார்

அருப்புக்கோட்டை: ரோடுகளில் சுற்றித்திரியும் மாடுகளால் விபத்து அபாயம் ஏற்பட்டுள்ளது என அருப்புக்கோட்டை நகராட்சிக் கூட்டத்தில் கவுன்சிலர்கள் புகார் கூறினர். அருப்புக்கோட்டை நகராட்சி அவசர கூட்டம் தலைவர் சுந்தரலட்சுமி தலைமையில் நடந்தது. கமிஷனர் ராஜமாணிக்கம், துணைத் தலைவர் பழனிச்சாமி பங்கேற்றனர். கூட்டத்தில் நடந்த விவாதம் பாலசுப்பிரமணியன், (இ.கம்யூ): திருநகரம், விருதுநகர் ரோடு பகுதியில் வாறுகால், ஆக்கிரமிப்பு, குடிநீர் பிரச்சனை ஆகிய மூன்று கோரிக்கைகளை தொடர்ந்து வலியுறுத்தி வருகிறேன். சரி செய்ய வேண்டும். முருகானந்தம், (பா.ஜ.,): திருச்சுழி ரோடு உரக்கடை பகுதியில் வாறுகால் இல்லாமல் மழைநீர் ஒரே இடத்தில் தேங்கியுள்ளது. கண்ணன், (தி.மு.க.,): தேவா டெக்ஸ் பழனி பகுதியில் அடிகுழாய் சேதமடைந்து பல மாதங்கள் ஆகிவிட்டது சரி செய்யப்படவில்லை. தலைவர்: போடப்பட்டுள்ள போர்வெல் குழாய் அடைப்பு உள்ளதால் அதற்கு மாற்றாக புதிய போர்வெல் போடப்படும். செந்திவேல், (தி.மு.க.): எனது 24 ஆவது வார்டு பகுதியில் பல வாக்காளர்களுக்கு தீவிர திருத்த படிவம் வழங்கப்படவில்லை. தமிழ்காந்தன், (தி.மு.க.,): நாகலிங்க நகர் பகுதியில் பல தெருக்களுக்கு பெயர் மாற்றம் செய்யப்பட வேண்டும். ரோடுகளில் மாடுகள் சுற்றி திரிவதால் அடிக்கடி விபத்து ஏற்படுகிறது. கட்டுப்படுத்த நடவடிக்கை தேவை. சிவப்பிரகாசம், (தி.மு.க.,): ரோட்டில் சுற்றி திரியும் ஆடு, மாடுகளைப் பிடித்து உரிமையாளர்கள் மீது வழக்கு பதிவு செய்து அன்றைய தினமே அவற்றை ஏலம் விடுவதற்குரிய நடவடிக்கையை செய்ய வேண்டும். இதற்கான தீர்மானத்தையும் நிறைவேற்ற வேண்டும். தலைவர்: கவுன்சிலர்கள் கோரிக்கைகள் அனைத்தும் பரிசீலனை செய்யப்பட்டு உரிய நடவடிக்கை எடுக்கப்படும். இவ்வாறு விவாதம் நடந்தது.