இன்ஜி., கவுன்சிலிங் வழிகாட்டி குன்றத்துார், அண்ணா நகரில் இன்று நடக்கிறது

சென்னை:'தினமலர்' நாளிதழ் சார்பில், இன்ஜினியரிங் கவுன்சிலிங் வழிகாட்டி நிகழ்ச்சி, இன்று, குன்றத்துாரில் உள்ள சென்னை இன்ஸ்டிடியூட் ஆப் டெக்னாலஜி கல்லுாரி வளாகம் மற்றும் சென்னை அண்ணா நகரில் உள்ள எஸ்.பி.ஓ.ஏ., ஸ்கூல் அண்டு ஜுனியர் கல்லுாரியில் நடக்கிறது.அண்ணா பல்கலையின் இணைப்பில் செயல்படும், 450க்கும் மேற்பட்ட இன்ஜினியரிங் கல்லுாரிகளில், பி.இ., - பி.டெக்., படிப்பில் முதலாம் ஆண்டில் சேர்வதற்கான ஆன்லைன் கவுன்சிலிங் துவங்கியுள்ளது. நாளை முதல் பொது கவுன்சிலிங் துவங்குகிறது. கவுன்சிலிங்கில் விருப்பமான கல்லுாரிகள் மற்றும் பாடப்பிரிவுகளை எப்படி தேர்வு செய்வது என்பது குறித்து, விரிவான விளக்கம் அளிக்கும் வகையில் இன்ஜினியரிங் கவுன்சிலிங் வழிகாட்டி நிகழ்ச்சி, 'தினமலர்' நாளிதழ் சார்பில் ஆண்டுதோறும் நடத்தப்படுகிறது.இந்தாண்டுக்கான நிகழ்ச்சி, சென்னை இன்ஸ்டிடியூட் ஆப் டெக்னாலஜி கல்லுாரியுடன் இணைந்து, சென்னையில் இன்று இரு இடங்களில் நடக்கிறது. காலை 10:00 மணி முதல் மதியம் 1:00 மணி வரை, குன்றத்துாரில் உள்ள சென்னை இன்ஸ்டிடியூட் ஆப் டெக்னாலஜி கல்லுாரி வளாகத்தில் நடக்கிறது. பிற்பகல் 3:00 மணி முதல் மாலை 6:00 மணி வரை, அண்ணா நகர் மேற்கு பிரிவில் உள்ள எஸ்.பி.ஓ.ஏ., ஸ்கூல் அண்டு ஜுனியர் கல்லுாரியில் நடக்கிறது.இந்நிகழ்ச்சிகளில், தமிழக இன்ஜினியரிங் மாணவர் சேர்க்கை முன்னாள் செயலர் மற்றும் கோவை, கே.பி.ஆர்., இன்ஸ்டிடியூட் ஆப் இன்ஜினியரிங் அண்டு டெக்னாலஜியின் தேர்வு கட்டுப்பாட்டு அதிகாரி டாக்டர் பி.நாராயணசாமி பங்கேற்று, இன்ஜினியரிங் நடைமுறைகள் குறித்து, மாணவர்களுக்கு விரிவான விளக்கம் அளிக்க உள்ளார்.இன்ஜினியரிங்கில் வேலைவாய்ப்புகள் மிகுந்த பாடப்பிரிவுகள் குறித்து, கல்வி ஆலோசகர் ஆர்.அஸ்வின் ஆலோசனை வழங்க உள்ளார். வழிகாட்டி நிகழ்ச்சி வாயிலாக, இந்தாண்டு எந்த படிப்புக்கு மவுசு அதிகம், சிறந்த கல்லுாரியை தேர்வு செய்வது எப்படி, முக்கிய இன்ஜினியரிங் படிப்புகளுக்கான வாய்ப்புகள் எப்படி? எந்த பாடப்பிரிவுக்கு எதிர்காலம் சிறப்பாக உள்ளது உள்ளிட்ட விபரங்களை, மாணவர்கள் நேரடியாக கேட்டு தெரிந்து கொள்ளலாம்.