தொழிலதிபர் ஓபுல் ரெட்டி சிறப்பு தபால் தலை வெளியீடு

சென்னை: தொழிலதிபர் ஓபுல் ரெட்டி நுாற்றாண்டு விழாவையொட்டி, தபால் துறை சார்பில் சிறப்பு தபால் தலை வெளியிடப்பட்டுள்ளது. தொழிலதிபர் பொட்டிப்பட்டி ஓபுல் ரெட்டியின் நுாற்றாண்டு விழாவையொட்டி, சிறப்பு தபால் தலை வெளியீடு நிகழ்ச்சி சென்னையில் நேற்று நடந்தது. அப்பல்லோ மருத்துவமனை குழுமத்தின் நிறுவனரும், ஓபுல் ரெட்டியின் சம்பந்தியுமான டாக்டர் பிரதாப் ரெட்டி முன்னிலையில், இந்திய தபால் துறையின் சென்னை தபால் சேவைகள் இயக்குநர் மேஜர் மனோஜ் , ஓபுல் ரெட்டியின் நினைவாக சிறப்பு தபால் தலையை வெளியிட்டார். நிகழ்ச்சியில் அவர்கள் பேசியதாவது: டாக்டர் பிரதாப் ரெட்டி: இன்றைய காலத்தில், ஒரு தொழிலை துவங்குவது எளிதாக இருக்கலாம். ஆனால், பல ஆண்டுகளுக்கு முன் அது அவ்வளவு எளிதானதல்ல. எனினும், ஓபுல் ரெட்டி தன் உழைப்பால் முன்னேறினார். இதுதான், அவரது தனிச்சிறப்பு. இவரை, தொழிலதிபர், தன்னார்வ தொண்டு செய்பவர் என, மட்டும் அடையாளப்படுத்த முடியாது. ஏனெனில், இசைக்காகவும் அவர் தன் பங்களிப்பை வழங்கினார். நாம் அவரை எப்போதும் நினைவில் கொள்ள வேண்டும். மேஜர் மனோஜ்: மனித உயிர்களை காப்பது மிகவும் உயர்ந்த செயல். அப்படிப்பட்ட செயல்களை, அப்பல்லோ மருத்துவமனை மேற்கொண்டு வருகிறது. ஒருவர் உலகின் எந்த பகுதியில் இருந்தாலும், திடீரென உடல்நலக் குறைவு ஏற்பட்டால், அவர்கள் உடனடியாக, அப்பல்லோ மருத்துவமனையை தான் தேர்வு செய்வர். அந்த அளவுக்கு, அந்த மருத்துவமனை மக்களின் நம்பிக்கையை பெற்றுள்ளது. இந்திய தபால் துறைக்கும், அப்பல்லோ மருத்துவமனைக்கும் நீண்ட கால தொடர்பு உள்ளது. ஒருவரின் பெயரில், தபால் தலை வெளியிடுவது, அவரது பெயர் வரலாற்றில் என்றும் நிலைத்து நிற்பதற்காகத்தான். அது மிகப்பெரிய கவுரவம். இளம் தலைமுறையினருக்காக, 'டிஜிட்டல் ஸ்டாம்ப்' திட்டத்தை செயல்படுத்துவது குறித்து, இந்திய தபால் துறை ஆலோசித்து வருகிறது. இவ்வாறு அவர்கள் பேசினர். இந்நிகழ்ச்சியில், அப்பல்லோ மருத்துவமனை நிர்வாக துணைத் தலைவர் டாக்டர் ப்ரீத்தா ரெட்டி, நிர்வாக இயக்குநர் சுனீதா ரெட்டி மற்றும் குடும்பத்தினர் பங்கேற்றனர்.