இலங்கைக்கு உதவ தயார் முதல்வர் ஸ்டாலின் அறிவிப்பு

சென்னை: 'டிட்வா புயலால் பாதிக்கப்பட்டுள்ள இலங்கைக்கு, மத்திய அரசுடன் இணைந்து உதவிக்கரம் நீட்ட தமிழக அரசு தயாராக உள்ளது' என, முதல்வர் ஸ்டாலின் தெரிவித்துள்ளார். அவரது அறிக்கை: 'டிட்வா' புயலால், நம் அண்டை நாடான, இலங்கை பேரழிவை சந்தித்துள்ளது. நுாற்றுக்கும் மேற்பட்டோர் இறந்தும், பல இடங்கள் கடும் பாதிப்புக்கு உள்ளாகியும், இலங்கை மக்கள் அவதியுறுகின்றனர். இலங்கை மக்களின் பெருந்துயரில், தமிழகமும், தமிழக மக்களும் பங்கெடுக்கிறோம். இலங்கையில் சிக்கி தவிக்கும், தமிழக பயணியரை மீட்க, அயலகத் தமிழர் நலத்துறை வாயிலாக நடவடிக்கை எடுக்கப்பட்டது. முதற்கட்டமாக, நான்கு குழந்தைகள், 60 பெண்கள் உட்பட 177 பேர் தமிழகம் அழைத்து வரப்பட்டு உள்ளனர். 'டிட்வா' புயல் காரணமாக பாதிக்கப்பட்டுள்ள, இலங்கை மக்களுக்கு, மத்திய அரசின் வாயிலாக உணவுப் பொருட்கள், மருந்து பொருட்கள் உள்ளிட்டவற்றை தந்து, அவர்கள் மீண்டெழ உதவிக்கரம் நீட்ட, தமிழக அரசு தயாராக இருக்கிறது. இதற்காக மத்திய அரசுடன் இணைந்து செயல்பட அதிகாரிகள் குழு அமைக்க, தலைமைச் செயலருக்கு அறிவுறுத்தப்பட்டுள்ளது. இவ்வாறு அறிக்கையில் கூறியுள்ளார்.