தோட்டக்கலை துறையில் ரூ.60 கோடி ஸ்வாகா

சென்னை: தோட்டக்கலை துறையின், 'தென்னை வேர் வாடல் நோய்' தடுப்பு திட்டத்தில், 60 கோடி ரூபாய் முறைகேடு நடந்துள்ளதாக அதிர்ச்சி தகவல் வெளியாகி உள்ளது. கோவை, திருப்பூர், திருநெல்வேலி, தென்காசி, தேனி, கன்னியாகுமரி, ஈரோடு, கரூர், தஞ்சாவூர், கடலுார் உட்பட பல மாவட்டங்களில், 10.50 லட்சம் ஏக்கரில், தென்னை சாகுபடி செய்யப்பட்டுஉள்ளது. இவற்றில் உற்பத்தியாகும் இளநீர், தேங்காய் உள்ளிட்ட பொருட்கள், பல்வேறு மாநிலங்களுக்கு அனுப்பப்படுவது மட்டுமின்றி, வெளிநாடுகளுக்கும் ஏற்றுமதி செய்யப்படுகின்றன. மகசூல் பாதிப்பு கேரள மாநிலத்தை ஒட்டியுள்ள, கோவை, திருநெல்வேலி, தென்காசி, தேனி, கன்னியாகுமரி, திருப்பூர் மாவட்டங்களில், தென்னை வேர் வாடல் நோய் பாதிப்பு ஏற்பட்டு வருகிறது. இதனால், தென்னையில் இளநீர் மற்றும் தேங்காய் மகசூல் பெருமளவு குறைந்து, விவசாயிகள் நஷ்டத்தை சந்தித்து வருகின்றனர். ஏற்றுமதியும் குறைந்துள்ளது. இரண்டு ஆண்டுகளுக்கு முன், கிலோ 10 முதல் 15 ரூபாய்க்கு விற்கப்பட்ட தேங்காய், தற்போது, 60 முதல் 70 ரூபாய்க்கு விற்கப்படுகிறது. இதனால், நுகர்வோர் கடுமையாக பாதிக்கப்படுகின்றனர். தென்னை வேர் வாடல் நோயை தடுக்க, தமிழக வேளாண் பல்கலை மட்டுமின்றி, நாடு முழுதும் உள்ள வேளாண் விஞ்ஞானிகள் வாயிலாக, எந்த நிரந்தர தீர்வும் இதுவரை கண்டறியப்படவில்லை. இந்நோயால் பாதிக்கப்படும் மரங்களை வெட்டி அகற்றி, மற்ற மரங்களுக்கு நோய் பரவாமல் தடுக்கும் வழிமுறை மட்டுமே செயல்பாட்டில் உள்ளது. அதன்படி, தமிழகத்தில் தென்னை வாடல் நோயால் பாதிக்கப்பட்ட மரங்களை வெட்டி அகற்றும் திட்டம், தோட்டக்கலை துறை வாயிலாக, 2023 முதல் செயல்படுத்தப் படுகிறது. இத்திட்டத்திற்கு, ஆண்டுக்கு 21 கோடி ரூபாய் ஒதுக்கப்பட்டுள்ளது. இந்நிதியில் நோய் தாக்கிய மரங்களை வெட்டி அகற்றுதல், இலவச தென்னங்கன்றுகள் வழங்குதல், தென்னந்தோப்புகளை புத்தாக்கம் செய்வதற்கு இடுபொருட்கள் வழங்குவது போன்றவை செய்யப்பட வேண்டும். மானியம் மேலும், ஒரு தென்னை மரத்தை வெட்டி அகற்ற, 1,000 ரூபாய் மானியமாக வழங்க வேண்டும். ஒரு ஏக்கரில், 70 மரங்கள் வரை விவசாயிகள் நடவு செய்துள்ளனர். இதில், 34 மரங்களை வெட்டி அகற்ற மட்டுமே மானியம் வழங்கப்படும் வகையில் அரசாணை வெளியிடப்பட்டது. அந்த அரசாணைப்படி, வெட்டிய மரங்களுக்கான மானியத்தை, விவசாயிகளுக்கு தோட்டக்கலை துறையினர் வழங்கவில்லை. சில விவசாயிகளுக்கு மட்டும், இலவசமாக மரக்கன்றுகள் வழங்கப்பட்டுள்ளன. தோப்புகளை புத்தாக்கம் செய்வதற்கு உயிர் உரம் வழங்குவதாகக் கூறி, தரமற்ற உரங்களை அதிகளவில் வினியோகம் செய்து வருகின்றனர். உற்பத்தி நிறுத்தம் முன்னர் வேளாண்மை மற்றும் தோட்டக்கலை பண்ணைகளில், தென்னங்கன்றுகள் தரமாக உற்பத்தி செய்யப்பட்டு விவசாயிகளுக்கு வழங்கப்பட்டன. தி.மு.க., ஆட்சிக்கு வந்த பின் பண்ணைகளில் உற்பத்தி நிறுத்தப்பட்டுஉள்ளது. 'டெண்டர்' வாயிலாக, கொள்முதல் செய்து, தென்னை விவசாயிகளுக்கு தென்னங்கன்றுகள் வழங்கப்பட்டு உள்ளன. அரசாணை மற்றும் வழிகாட்டு நெறிமுறைகளை மீறி, தோட்டக்கலை துறையினர், தென்னை வேர் வாடல் நோய் திட்டத்தில், 60 கோடி ரூபாய் வரை முறைகேடு செய்துள்ளதாக அதிர்ச்சி தகவல் வெளியாகியுள்ளது. இதனால், புதிய தென்னை மரங்கள் உற்பத்தி குறைந்து, தேங்காய் விலை விண்ணை முட்டும் அளவிற்கு உயர்ந்துஉள்ளது.

'நடவடிக்கை எடுக்க வேண்டும்'

தமிழகத்தைச் சேர்ந்த, தென்னை விவசாயிகள் சங்க நிர்வாகிகள் சிலர் கூறியதாவது: தமிழகத்தில், 30 சதவீத அளவிற்கு, தென்னை வேர் வாடல் நோயால் மரங்கள் பாதித்துள்ளன. கேரள மாநிலத்தை ஒட்டிய மாவட்டங்களில், 50 சதவீதத்திற்கு மேல் பாதிப்பு ஏற்பட்டுள்ளது. பாதிக்கப்பட்ட தென்னை மரங்களை அகற்றி, புதிதாக நடவு செய்வதற்கு, 12.20 லட்சம் தென்னங்கன்றுகள் வழங்கப்பட்டுள்ளதாக தோட்டக்கலை துறை புள்ளி விபரம் தெரிவிக்கிறது. இதற்காக, 17.8 கோடி ரூபாய் செலவிடப்பட்டுள்ளது. இத்தொகை யாருக்கு வழங்கப்பட்டது என்ற முழு விபரம் இல்லை. தேசிய தென்னை வளர்ச்சி வாரியம் வாயிலாக, 10.7 கோடி ரூபாய் அளவிற்கு, மறுநடவு செய்ய மானியம் வழங்கப்பட்டுள்ளது. இது யாருக்கு கிடைத்தது என்ற விபரமும் இல்லை. தோட்டக்கலை துறையில் அரங்கேறி வரும் முறைகேடுகள் குறித்து, அரசு தீவிரமாக ஆராய்ந்து நடவடிக்கை எடுக்க வேண்டும். இவ்வாறு அவர் கூறினார்.