சென்னை உள்ளிட்ட நகரங்களில் பைக் டாக்சிகள் அதிகரித்து விட்டன. குறைந்த செலவில் மக்கள் ஆர்வத்துடன் பைக் டாக்சிகளில் பயணிக்கின்றனர். இருசக்கர வாகனங்களை வணிக நோக்கத்துடன் பயன்படுத்த தடை விதிக்கப்பட்டுள்ள நிலையில் ஊபர், ஓலா பல்வேறு நிறுவனங்கள் இந்த சேவையை வழங்கி வருகின்றன. அதேநேரத்தில், பைக் டாக்சிகளால் தங்களது வாழ்வாதாரத்துக்கு ஆபத்து ஏற்பட்டுள்ளதாக, ஆட்டோ டிரைவர்கள் கூறுகின்றனர். பல இடங்களில் பைக் டாக்சி டிரைவர்களை தாக்கும் சம்பவம் நடக்கிறது. சொந்த பைக்குகளையே பைக் டாக்சியாக பலர் இயக்குவதால் விபத்து ஏற்படும் சமயங்களில் அதில் பயணிக்கும் மக்களுக்கு இழப்பீடு கிடைப்பதில் சிக்கல் ஏற்படுகிறது இதையெல்லாம் கருத்தில் கொண்டு, விதிகளை மீறி இயக்கப்படும் பைக் டாக்சிகள் மீது நடவடிக்கை எடுக்கும்படி போக்குவரத்து துறை அதிகாரிகளுக்கு அரசு உத்தரவிட்டுள்ளது.